IT Park USAID agentligi bilan birgalikda Qoraqalpog‘iston qishloq ayol-qizlari uchun AKT bo‘yicha keng qamrovli “IT Women — Karakalpakstan” dasturini ishga tushirdi.
Dastur pilot tarzida ishga tushirilgan. Unda ayollarga AKTning asosiy ko‘nikmalari bo‘yicha bilimlar berish nazarda tutilgan bo‘lib, bu ularga kelajakda ish yoki tadbirkorlik bilan shug‘ullanish imkonini beradi. Ishtirokchilarga ta’limdan tashqari mentorlik ko‘magi ham beriladi.
Loyiha doirasida 60 nafar xotin-qizlar IT Park ko‘magida Nukus shahridagi IT-akademiya tomonidan tashkil etilgan bepul o‘quv kurslarida ishtirok etadi.
Ularning 30 nafari grafik dizayn kurslari, 30 nafari SMM yo‘nalishiga tahsil oladi.
Ushbu tashabbus USAID’ning iqlim o‘zgarishidan jabr ko‘rgan ayollarga kasbiy bilimlarni egallashda ko‘maklashish, mikrokreditga ega bo‘lishda yordam berish, shuningdek, amaliyot o‘tash, ishga joylashish va maslahat berish orqali ularning imkoniyatlarini kengaytirishga qaratilgan keng qamrovli dasturining bir qismidir.
USAID’ning O‘zbekistondagi missiyasi direktori Mikaela Meredit ta’kidlashicha, ayollar raqamli va tadbirkorlik ko‘nikmalarini rivojlantirish orqali elektron tijorat bilan shug‘ullanishlari mumkin.
Bundan tashqari ular global va mahalliy platformalar orqali tovarlarni sotishlari, o‘z bizneslarini ilgari surish uchun ijtimoiy tarmoqlardan foydalanishlari hamda boshqa imkoniyatlarga ega bo‘ladi.
Xotin-qizlarning iqtisodiy imkoniyatlarini kengaytirish gender tengligiga erishish, turmush darajasini oshirish hamda inklyuziv va barqaror iqtisodiy o‘sishga erishishning kalitidir.
Izoh (0)