Тошкент шаҳар ҳокимлиги ва Ёшлар ишлари агентлиги Тошкент шаҳар бошқармаси томонидан “Тошкент ёшларни севади” ойлиги доирасида ишсиз юрган ёки оналик таътилидаги аёл-қизлар учун “Пойтахтнинг SMMчи қизлари” лойиҳаси ташкил қилинди.
Мазкур курсда тингловчилар сафи тобора кенгайиб, кўплаб аёлларда қизиқиш уйғотди. Жумладан, 27 ёшли, икки фарзанднинг онаси Феруза Раҳматова оналик таътили вақтида ушбу курсда ўқимоқда.
“Оналик таътили аёлга бир қадар қувонч улашса, бир қадар тунд кайфият ҳам улашиши сир эмас. Аксарият оналик таътилидаги аёллар ўзини жамиятдан орқада қолаётгандай ҳис қилади. Ўзим 7 йилдан буён оналик таътилидаман. Болаларим ҳозир боғчага боришади. Бўш вақтларимда қўшимча бирор иш қилиб, даромад топиш истагим бор эди. Ижтимоий тармоқлар орқали бепул SMM курслари эълонига кўзим тушди. Дарҳол рўйхатдан ўтдим. Бир оз муддатдан сўнг машғулот админлари менга қўнғироқ қилиб, курсга қабул қилинганимни маълум қилишди. Дарслар қисқа муддатда менда яхши таассурот уйғотди. Машғулотлар куннинг тўртта қисмида ташкил қилингани ёш оналар ўзлари истаган вақтда келиб қатнашиш имконини беради. Бу эса биз учун айни муддао”, дейди Феруза Раҳматова.
Унинг айтишича, менторлар — бизга дарс берувчи устозлар методлари жуда тартибли. Ҳар бир тренер интернетдаги онлайн дарслардан фарқли равишда соҳанинг майда деталларигача тушунча бермоқда.
“Биласиз, SMM ўз ичига копирайтинг, таргет, мобилография, график дизайн каби бир нечта йўналишларни олади. Мен ўзим ижодкорман, шеърлар ёзаман. Касбим жиҳатидан эса режиссёрман. Шундан келиб чиқиб, мазкур замонавий касбни ўргансам фаолиятимга ҳам ижодий ёндашишимга ишонаман. Шу сабаб ҳар бир йўналишни пухта ўрганишга ҳаракат қилябман.
Келгусида уйда ўтирган қизлар ва оналик таътилидаги аёллар учун SMM сир-асрорини ўргатувчи таълим блоги очиш ниятим бор. Бунда уйдан чиқмаган ҳолда қиз-аёллар онлайн курсларда таҳсил олиши ва ўзининг ижодий ишларидан энг сара намуналарини саҳифада эълон қилишлари мумкин бўлади”, дея қўшимча қилади Феруза Раҳматова.
Изоҳ (0)