Farg‘ona viloyatining Quvasoy shahrida 4,1 mlrd so‘mlik qum shag‘al aralashmasini o‘zboshimchalik bilan qazib olish holati aniqlandi, deb xabar berdi Bosh prokuratura huzuridagi Iqtisodiy jinoyatlarga qarshi kurashish departamenti.
Maʼlum qilinishicha, “F.X.” MCHJ masʼul shaxslari geologik jihatdan o‘rganish ishlarini olib borish uchun “Quvasoy-1” qum-shag‘al koni hududidan ajratilgan yer maydonidan 18 344 kub metr qum-shag‘al aralashmasini o‘zboshimchalik bilan qazib olgan.
Natijada davlat va jamiyat manfaatlariga 4,1 mlrd so‘m zarar yetkazilgan.
Mazkur holatlar yuzasidan Jinoyat kodeksining 229-moddasi (o‘zboshimchalik) bilan jinoyat ishi qo‘zg‘atilib, tergov harakatlari o‘tkazilmoqda.
Qum-shag‘al aralashmasi qazib olish holatlari ko‘paymoqda
Oktyabr oyi oxirida Chirchiq daryosidan qum-shag‘al aralashmasi qazib olinishi oqibatida tabiatga 273,8 mlrd so‘m zarar yetkazilgandi.
Noyabr oyi boshida esa Qashqadaryo va Samarqand viloyatlarida foydali qazilmalarni o‘zboshimchalik bilan qazib olish holatlari fosh etilgandi.
Shuningdek, keyinroq Chirchiq daryosidan qum-shag‘al aralashmasi qazib olinishi oqibatida tabiatga 233 mlrd so‘m zarar yetkazildi.
Izoh (0)