Gonkongda ilk bor dinozavr qoldiqlari topildi, deya mahalliy qadimiy obidalar va yodgorliklar boshqarmasi xabar berdi.
Topilgan qoldiqlar taxminan 145-66 million yil oldin yashagan bo‘r davri katta dinozavriga tegishli.
“Dinozavr turlarini aniqlash uchun ko‘proq tadqiqotlar talab etiladi”, deb yozadi The Guardian.
Qoldiqlar YUNESKO global geoparki Port orolida topilgan. Mutaxassislar dinozavrning jasadi qum va shag‘al qatlami ostida ko‘milgan, keyin kuchli suv toshqini natijasida yuzaga ko‘tarilgan va cho‘kindi qatlami ostida yana ko‘milgan deb taxmin qilgan. Shu paytgacha Gonkongda topilgan dinozavrlar yashagan davrga oid yagona topilmalar baliq qoldiqlari bo‘lgan.
Gonkongdagi Xitoy universiteti paleontologi professor Maykl Pittmanning ta’kidlashicha, Gonkong dinozavr izlarini uzoq vaqtdan beri qidirmoqda, biroq hozircha muhim topilmalar bo‘lmagan. Pittman, shuningdek, Gonkongning urbanizatsiya darajasi yuqori bo‘lishiga qaramay, shahar hududining yarmini parklar egallaganini ta’kidlagan. Unga ko‘ra, bog‘larning landshafti dinozavrlar davridagi toshlardan iborat, ammo bular asosan vulqon jinslari bo‘lib, qazilmalarni topishni qiyinlashtiradi.
Keyingi tadqiqotlar uchun hukumat materik Xitoydan mutaxassislarni jalb qildi. Port oroli hozirda jamoatchilik uchun yopiq, chunki u yerda qo‘shimcha dala tadqiqotlari va qazishmalar olib borilmoqda.
Izoh (0)