Afsonaviy go‘zal Merilin Monro olamdan o‘tganiga 60 yil bo‘ldi. Biroq uning jozibadorligi sirlarini ayollar hozirgacha muhokama qilishadi. Aktrisa nafaqat ko‘zni qamashtiradigan tabassumi va jingalak sochlari bilan, balki jozibali qomati bilan ham mashhur edi. Merilin buni qanday uddalagani haqida gaplashamiz.
Ovqatlanish tartibi
Aktrisani nafis va xushbichim deb atab bo‘lmaydi. Hozirgi kunda u plus-size o‘lchamida bo‘lishi mumkin, chunki brendlar ko‘pincha oddiy ayollar uchun emas, balki modellar uchun kiyim tikishadi. Merilin kamdan kam uchraydigan “qum soat” siluetiga ega edi.
Uning ko‘pgina suratlarida sellyulit ko‘zga tashlanib turadi, sonlari keng, qorni kichkina bo‘lsa-da, bularning hammasi uning tashqi qiyofasida ajoyib tarzda uyg‘unlashgandi. U bejiz go‘zallik ramzi bo‘lmagan — uning qiyofasi har doim haqiqiy ayollik jozibasiga ega bo‘lgan. U o‘zini yaxshi holatda ushlab turish uchun qanday ovqatlangan? Aktrisaning parhezini biroz noan’anaviy deb hisoblash mumkin.
Monro intervyularidan birida nonushtaga sut bilan aralashtirilgan xom tuxum ichishni afzal ko‘rishini aytadi. Bunday nonushta unga kuch-quvvat bag‘ishlashga yordam berardi, kechki ovqatga esa qovurilgan go‘shtni xom sabzi bilan yeyishni yoqtirardi. “Xom sabzi hech qachon jonimga tegmaydi”, derdi Merilin. Shuningdek, Monro ba’zi narsalardan o‘zini cheklamasdi. U shirinliklarni yaxshi ko‘rardi.
Bunday parhezni samarali deb atash qiyin, ammo aktrisaning shaxsiy misolida ovqatlanish tartibini tanlashda birinchi navbatda o‘z ehtiyojlariga e’tibor qaratish kerakligini ko‘rsatdi. Shuning uchun kechki ovqatga sabzavotli salatdan ko‘ra go‘shtni afzal ko‘rsangiz, o‘zingizni qiynamang va yoqimsiz taomni yeyishga majburlamang.
Sport
Ko‘pchiligimizga o‘xshab Merilinga ham sport rejimiga rioya qilish oson bo‘lmagan. Aktrisa ba’zi o‘yinlar va sport turlarini, masalan, suzishni yoqtirmasdi, lekin ko‘pincha og‘ir mashqlar bilan shug‘ullangan.
Merilin yotgan holatda gantel ko‘tarish foydali ekanini ta’kidlagan. U qo‘llarini yozib, boshi ustidagi nuqtaga 15 martadan ko‘taradi. Amalda bunday mashqlar ko‘proq qo‘l va yelka mushaklari bilan ishlaydi, lekin ko‘krak mushaklari ham ishtirok etadi. Merilin har kuni ertalab mashq qilishga kamida o‘n daqiqa vaqt sarflardi. Ovqatlanishda bo‘lgani kabi aktrisa sport mashg‘ulotlarini ham xohishlaridan kelib chiqib, intuitiv ravishda tanlagan. Aytish mumkinki, Monro muntazam ravishda yengil mashqlarini bajargan.
Mashhur kinoaktrisa go‘yo hamma narsada o‘z uslubini yaratishni yaxshi ko‘rardi — u o‘ziga qarashga ham alohida yondashar, umumiy qabul qilingan qoliplardan qochardi.
Izoh (0)