Qirg‘izistonning Issiqko‘l viloyatida joylashgan to‘rtta pansionat O‘zbekistonga berildi.
Shavkat Mirziyoyev Qirg‘iziston hukumati bilan Issiqko‘ldagi kurort va dam olish maskanlari to‘g‘risidagi kelishuvni tasdiqladi. Bitim Sadir Japarovning iyul oyidagi O‘zbekistonga tashrifi doirasida imzolangandi. Qirg‘iziston Vazirlar Mahkamasi ushbu kelishuvni 23-sentyabrda tasdiqlagan.
Unga ko‘ra, Issiqko‘l sohilidagi avval O‘zbekistonga tegishli bo‘lgan quyidagi to‘rtta pansionat o‘zbekistonlik investorlarga 49 yilga ijaraga beriladi:
- “Dilorom” — “Asakabank”ka;
- “Oltin qumlar” — Toshkent mexanika zavodiga;
- “Rohat” — “O‘zmilliybank”ka;
- qurilishi tugallanmagan “Bo‘ston” majmuasi — “O‘zsanoatqurilishbank”ka.
Investorlar obyektlarni 3−4 yulduz darajasida rekonstruksiya qilishi, shuningdek, xodimlarining kamida 80 foizi Qirg‘iziston fuqarolaridan iborat bo‘lishi kerak. Har bir obyekt uchun taxminiy investitsiya miqdori 15−20 million dollarni tashkil etadi.
Bitimning bajarilishi uchun javobgarlik Davlat aktivlarini boshqarish agentligi zimmasiga yuklanadi. Tashqi ishlar vazirligiga Qirg‘iziston hukumatiga shartnomaning kuchga kirishi uchun tartib-taomillarning bajarilishi to‘g‘risida bildirishnoma yuborish topshirildi.
O‘zbekistonning Issiqko‘ldagi sobiq pansionatlari
- 2016-yilda Temir Sariyev boshchiligidagi Qirg‘iziston hukumati Issiqko‘lda O‘zbekistonga tegishli bo‘lgan to‘rtta pansionat: “Rohat-NBU” (keyinchalik (Altin Jay deb o‘zgartirildi), “Oltin qum” (keyinchalik Bosteri), “Dilorom” (keyinchalik Enesay) va Bo‘ston (nomi saqlanib qolgan) pansionatlarini milliylashtirishga qaror qildi.
- O‘zbekiston holat yuzasidan AQSHdagi xalqaro arbitrajga da’vo arizasi berdi. Toshkent qirg‘iz tomonini sobiq SSSR davlatlari o‘rtasida ittifoq parchalanganidan keyin boshqa respublika hududida qolib ketgan obyektlardan foydalanish bo‘yicha 1992-yilda imzolangan kelishuvni buzgan, deb hisobladi.
- 2017-yil dekabrida Sapar Isoqov boshchiligidagi Qirg‘iziston hukumati Bishkek to‘rtta pansionatni O‘zbekistonga berishga qaror qilgani, biroq yerni o‘zida saqlab qolayotgani haqida xabar berdi. Buning evaziga O‘zbekiston pansionatlarga sarmoya kiritishi va xalqaro arbitrajdan da’vosini qaytarib olishi kerak edi. Ammo tomonlar o‘rtasida kelishuv imzolanmagani ma’lum qilindi.
- 2023-yilda O‘zbekiston bosh vaziri Abdulla Aripovning Qirg‘izistonga tashrifi doirasida O‘zbekiston delegatsiyasi “Enesay” (sobiq “Dilorom”) pansionatiga tashrif buyurib, uni ko‘zdan kechirdi. “Dilorom”, “Oltin qum” va “Rohat” pansionatlari investorlar ixtiyoriga berish rejalashtirilgani ma’lum qilindi.
Ijtimoiy tarmoqlarning qirg‘iz segmentida pansionatlarning o‘zbekistonlik investorlarga 49 yilga ijaraga berilishi uzoq muddat ekani, bu 5-10 yilni tashkil etishi kerakligi xaqida fikrlar tarqalgach, Qirg‘iziston prezidenti Sadir Japarov “Kabar” agentligiga bergan intervyusida buning sababiga to‘xtalib o‘tgandi.
“To‘rtta pansionat bo‘yicha quyidagilarni aytaman. 2016-yilda Temir Sariyev bosh vazir sifatida ularni tortib oldi, to‘g‘risini aytsam, bu ko‘proq populizmga o‘xshardi. O‘shanda arxiv hujjatlarini o‘rganish va bu obyektlarning kelajagi haqida fikr yuritish kerak edi. Agar shunday harakat bilan xalqaro sudda yutqazib qo‘ymasligimizga kafolatlar bo‘lsa, maqsadga muvofiq bo‘lardi” degan Japarov.
Prezidentning bildirishicha, o‘sha yili O‘zbekiston tomoni Vashingtondagi xalqaro sudga murojaat qilib, 65 million dollar tovon to‘lashni talab qilgan.
2017-yilda Sapar Isoqov O‘zbekiston tomoniga maktub yo‘llab, muammoni tinch yo‘l bilan hal qilish va to‘rtta pansionatni O‘zbekiston tomoniga qaytarish masalasini ishlab chiqishni taklif qilgan. Shuningdek, u da’voni qaytarib olishni so‘ragan. Ammo O‘zbekiston tomoni da’volaridan voz kechmadi.
2023-yilning may oyida sud Qirg‘iziston tomoni 40 million dollardan ortiq pul to‘lashi kerak, degan qarorga kelgan. Biz O‘zbekiston tomoni bilan muzokaralar olib bordik va obyektlarni 49 yilga ijaraga berishga, ularni to‘rt-besh yulduzli mehmonxonalar darajasiga ko‘tarishlari bo‘yicha kelishib oldik: ularga belgilangan summani to‘lashga imkonimiz yo‘q”, deb ta’kidladi prezident.
Japarovning aytishicha, ushbu pansionatlar bugungi holati vayronaga aylanganki, ularni omborxona deb atash mumkin. Bu ularni rivojlantirishni talab qiladi.
Izoh (0)