Toshkentdagi MCHJlardan biri 7,5 mlrd so‘mlik “svet”dan noqonuniy foydalangani aniqlandi
Toshkent shahrida elektr hisoblagichga tashqi taʼsir ko‘rsatib, 7,5 mlrd so‘mlik elektr energiyasidan noqonuniy foydalangan MCHJ aniqlandi, deb xabar berdi “O‘zenergoinspeksiya” matbuot xizmati.
Foto: “O‘zenergoinspeksiya” matbuot xizmati
Maʼlum qilinishicha, Yashnobod tumanida joylashgan “K.I.” MCHJ masʼullari elektr hisoblagichga tashqi taʼsir ko‘rsatib, elektr energiyasidan noqonuniy foydalangan.
Ushbu qoidabuzarlik natijasida elektr taʼminoti korxonasiga 7 mlrd 528 mln so‘mlik zarar yetkazilgan.
Mazkur holat yuzasidan tegishli hujjatlar rasmiylashtirilib, huquqni muhofaza qiluvchi organlarga yuborildi.
Energiya resurslaridan noqonuniy foydalanish holatlari ortib bormoqda
Bugunga qadar O‘zbekistonning turli hududlarida energiya resurslaridan noqonuniy foydalanish holatlari aniqlanmoqda. Ushbu holatlarning aksariyatida miqdor mlrd so‘mdan ortiq.
Jumladan, Sirdaryoda 683 mln so‘mlik “svet”dan noqonuniy foydalangan shaxs ushlangan edi. Shuningdek, Sirdaryodagi maishiy xizmat ko‘rsatish shoxobchasida 325 mln so‘mlik “svet”dan noqonuniy foydalanilgani aniqlangandi.
Shu bilan birga, Qoraqalpog‘iston Respublikasi va Toshkentda jami 2 mlrd so‘mlik “svet”dan noqonuniy foydalanilgani haqida xabar berilgan edi.
Angrendagi metan zapravkada 1,1 mlrd so‘mlik elektr energiyasidan noqonuniy foydalanilgani aniqlangan.
Izoh (0)