Qoraqalpog‘istonning Nukus shahri, To‘rtko‘l va Qorao‘zak tumanlarida energiya resurslaridan noqonuniy foydalanish va qalbaki dalolatnoma tuzib berish holati aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, Nukus shahrida faoliyat yurituvchi “P.F.” MCHJ masʼul shaxslari maktabgacha taʼlim muassasasida davlat standartlariga javob bermaydigan yaroqsiz gaz hisoblash uskunasini o‘rnatgan. Natijada 200 mln so‘mlik tabiiy gazdan noqonuniy foydalanilgan.
Shuningdek, To‘rtko‘l tumanida ETK muhandisi T.I. YATT N.T.ning savdo do‘koniga yangi elektr hisoblagich uskunasini o‘rnatib, hisoblagich o‘rnatilganligi to‘g‘risida qalbaki dalolatnoma tuzgan. U N.T.ga jami 69 mln so‘mlik “svet”dan noqonuniy foydalanishga sharoit yaratib bergan.
Bundan tashqari, Qorao‘zak tumanida “R.s.” va “V.M.” MCHJ masʼul shaxslari elektr suv nasoslarini umumiy foydalanishdagi tarmoqqa o‘zboshimchalik bilan ulab, 70 mln so‘mlik elektr energiyasidan noqonuniy foydalangan.
Mazkur holatlar yuzasidan Jinoyat kodeksining 169-moddasi (o‘g‘rilik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishlari qo‘zg‘atilib, tergov harakatlari o‘tkazilmoqda.
Bu holatlar deyarli har kuni uchramoqda
Jumladan, 12-noyabr kuni “Daryo” shu kabi holatlar haqida xabar bergan. Masalan, Jizzaxda 1,1 mlrd so‘mlik “svet”dan noqonuniy foydalangan shaxs ushlangani, bundan tashqari, uchta viloyatda jami 628 mln so‘mlik “svet”dan noqonuniy foydalanish holatlari aniqlangani haqida xabar berildi.
Avvalroq, Sirdaryoda 683 mln so‘mlik “svet”dan noqonuniy foydalangan shaxs ushlangan edi. Shuningdek, Sirdaryodagi maishiy xizmat ko‘rsatish shoxobchasida 325 mln so‘mlik “svet”dan noqonuniy foydalanilgani aniqlangandi.
Shu bilan birga, Qoraqalpog‘iston Respublikasi va Toshkentda jami 2 mlrd so‘mlik “svet”dan noqonuniy foydalanilgani haqida xabar berilgan edi. Angrendagi metan zapravka 1,1 mlrd so‘mlik elektr energiyasidan, Samarqanddagi metan zapravkada 6,6 mlrd so‘mlik gazdan noqonuniy foydalanilgani aniqlangan.
Izoh (0)