Chustdagi ishlab chiqarish sexida 2,1 mlrd so‘mlik “svet”dan noqonuniy foydalanildi
Namangan viloyatining Chust tumanida 2,1 mlrd so‘mlik elektr energiyasidan noqonuniy foydalangan MCHJ fosh etildi. Bu haqda “O‘zenergoinspeksiya” matbuot xizmati xabar berdi.
Foto: “O‘zenergoinspeksiya” matbuot xizmati
Maʼlum qilinishicha, “Ch.Sh.” MCHJ masʼullari ishlab chiqarish sexida elektr energiyasi hisobi uchun o‘rnatilgan tok transformator qasddan uzib qo‘yib, elektr energiyasidan noqonuniy foydalangan.
Ushbu qoidabuzarlik natijasida elektr taʼminoti korxonasiga 2 mlrd 159 mln so‘mlik zarar yetkazilgan.
Mazkur holat yuzasidan tegishli hujjatlar rasmiylashtirilib, huquqni muhofaza qiluvchi organlarga yuborildi.
“Svet”dan noqonuniy foydalanish holatlari ortib bormoqda
Bugunga qadar O‘zbekistonning turli hududlarida energiya resurslaridan noqonuniy foydalanish holatlari ko‘plab uchramoqda. Ushbu holatlarning aksariyatida miqdor mlrd so‘mdan ziyod.
Jumladan, Sirdaryoda 683 mln so‘mlik “svet”dan noqonuniy foydalangan shaxs ushlangan edi. Shuningdek, Sirdaryodagi maishiy xizmat ko‘rsatish shoxobchasida 325 mln so‘mlik “svet”dan noqonuniy foydalanilgani aniqlangan.
Shu bilan birga, Qoraqalpog‘iston Respublikasi va Toshkentda jami 2 mlrd so‘mlik “svet”dan noqonuniy foydalanilgani haqida xabar berilgan edi.
Angrendagi metan zapravkada 1,1 mlrd so‘mlik elektr energiyasidan noqonuniy foydalanilgani aniqlangan.
Izoh (0)