Yo‘l qurilishi hamda taʼmirlash faoliyati bilan shug‘ullanuvchi MCHJ rahbari N.Sh. o‘zganing ishonchiga kirib, yo‘l qurilishi bo‘yicha buyurtma olib berishni vaʼda qilgan.
N.Sh. unga “Toshkent—Boysun” avtoyo‘lini qurish va taʼmirlash loyihasi bo‘yicha tender g‘olibi bo‘lgan xorijiy kompaniyaning qiymati 500 ming dollarlik qurilish ishlarini bajarish yuzasidan buyurtmasini olib berishini aytgan.
Buning evaziga 50 ming dollar talab qilgan va kelishilgan pulni olgan vaqtida ushlangan.
N.Sh. muqaddam bir necha marotaba sudlangan bo‘lishiga qaramay, xatolaridan to‘g‘ri xulosa chiqarmagan.
Hozirda unga nisbatan Jinoyat kodeksining 168 (firibgarlik) va 211-moddalari (pora berish) bilan jinoyat ishi qo‘zg‘atilib, tergov harakatlari olib borilmoqda.
Aprel oyida Davlat xavfsizlik xizmati xodimlari tomonidan Andijon viloyatida 42 mlrd so‘mlik loyihani olib berish evaziga pul talab qilgan shaxslar ushlangandi.
Shuningdek, 2023-yilning may oyida Namanganda 1 gektar yerni tenderda yutib berish uchun 10 ming dollar so‘ragan mansabdor qo‘lga olingan.
Oktyabr oyida esa Xorazmda faoliyat boshlaganiga 4 kun bo‘lgan firma tenderdagi 5 ta tanlovda g‘olib bo‘lib, 1 milliard so‘mdan ortiq mablag‘ni qo‘lga kiritgani ma’lum bo‘lgandi.
Izoh (0)