Samarqand shahrida Abu Dabi Taraqqiyot jamg‘armasi ishtirokida suv taʼminoti tizimlari va yo‘l tarmoqlarini modernizatsiya qilish ishlariga kirishildi, deb xabar beradi O‘zA.
O‘zbekiston va Abu Dabi Taraqqiyot jamg‘armasi o‘rtasida 2022-2026-yillar loyihasini amalga oshirish uchun 4 yillik imtiyoz davrini o‘z ichiga olgan, 17 yilda qaytarish muddati bilan qarz bitimi imzolangan. Loyihaning texnik iqtisodiy asoslari hamda tender hujjatlari Vazirlar Mahkamasining 2020-yil 18-noyabrdagi yig‘ilish bayoniga asosan Worley Parsons Uzbekistan Engineering MCHJ tomonidan ishlab chiqilgan.
Loyihani jadallashtirish maqsadida ish hajmlari 4 ta lotga ajratilgan, xalqaro tender savdolariga “Qurilish ishlarini tayyor holda topshirish” sharti bilan eʼlon berilib, tender savdolari o‘tkazilib pudratchi kompaniyalar aniqlangan.
Birinchi lotda Amir Temur ko‘chasining Bo‘stonsaroy ko‘chasidan Gagarin ko‘chasigacha bo‘lgan 2,3 kilometr qismida hamda Gagarin ko‘chasining Gulobod ko‘chasidan M-37 avtomobil yo‘ligacha bo‘lgan 9,2 kilometr qismida qurish va rekonstruksiya ishlari amalga oshiriladi. Tender natijalari bo‘yicha ushbu 32,9 million AQSH dollari miqdoridagi vazifani New Tech Samarkand, Sinoindustrial Tashkent hamda Turkiyaning Tekar Teknik Arastirma Ticaret Limited Sirketi korxonalaridan iborat konsorsium amalga oshiradi.
Ikkinchi lotga Gagarin va Mirzo Ulug‘bek ko‘chalari kesishmasida (umumiy uzunligi 750 metr) hamda Gagarin va Rudakiy ko‘chalari kesishmasida (umumiy uzunligi 650 metr) tunnel hamda Gagarin ko‘chasidagi temiryo‘l ustida 78 metrlik, shu ko‘cha davomidagi Siyob kanali ustida 165 metrlik ko‘prik quriladi.
Umumiy qiymati 84,2 million AQSH dollari bo‘lgan bu tunnel va ko‘priklar qurilishi “Me’mor Utkir Chovka LLC” va Xitoyning Shaanxi Road and Bridge Group Co., Ltd korxonalari konsorsiumi tomonidan bajariladi.
Ko‘prik va tunnellar bosqichma-bosqich quriladi hamda bu jarayonda yo‘llarda transport vositalari va piyodalar harakati to‘xtatilmaydi, xavfsiz harakatlanish choralari ko‘riladi. 2023-yil yakuniga qadar Gagarin va Mirzo Ulug‘bek ko‘chalari kesishmasidagi tunnelning birinchi bosqichini yakunlash ko‘zda tutilgan.
Uchinchi (31,6 million dollarlik) va to‘rtinchi (13,9 million dollarlik) lot Samarqand shahri suv inshootlari bilan bog‘liq bo‘lib, unda Dahbet va Cho‘pon ota suv inshootlari hamda 6 ta nasos stansiyalarini rekonstruksiya qilish, Amir Temur va Gagarin ko‘chalarida 13,9 kilometr yangi ichimlik suv tarmoqlari qurish belgilangan.
Mazkur obyektlar O‘zbekiston tomonidan MESMER-EAST LLC va Turkiyaning GÜÇLÜ İNŞAAT korxonasidan iborat konsorsium tomonidan quriladi. Ayni paytda Amir Temur ko‘chasida 2,3 kilometr masofaga suv tarmog‘i tortish ishlari boshlangan. Ushbu obyektda ilk bor xorijdan keltirilgan diametri 500 millimetr bo‘lgan cho‘yan quvurlardan foydalanilmoqda. Suv va boshqa kommunikatsiya tarmoqlari tortib bo‘lingach ushbu ko‘chani rekonstruksiya qilishga kirishiladi.
Izoh (0)