O‘zbekistonda mahallalar infratuzilmasini yanada yaxshilash uchun qancha mablag‘ ajratilgani ma’lum qilindi

Senatning o‘ttiz oltinchi yalpi majlisida mahallalar infratuzilmasini yanada yaxshilash bo‘yicha belgilangan loyihalar yuzasidan parlament nazorati doirasida amalga oshirilgan ishlar muhokama qilindi.

Qayd etilishicha, mahallalarda infratuzilma bilan bog‘liq ichki yo‘llar, ichimlik suvi, elektr energiyasi va gaz ta’minotini yaxshilash, ijtimoiy soha obyektlarini ta’mirlash masalalari bo‘yicha hududlarda senatorlar tomonidan o‘rganishlar olib borilgan.

Prezidentning 2022-yil 25-oktabrdagi qaroriga ko‘ra, 2022—2023-yillarda mahallalar infratuzilmasini yanada yaxshilash bo‘yicha 5 284 ta mahalladagi 6 007 ta obyektda qurilish-ta’mirlash ishlarini amalga oshirish uchun 7 trillion so‘mdan ortiq mablag‘ ajratilishi rejalashtirilgan.

Qurilish-ta’mirlash ishlari amalga oshiriladigan 6 007 ta obyekt bo‘yicha aksariyat loyihalarning loyiha-smeta hujjatlari ekspertizadan o‘tkazilgan, shuningdek, qurilish-pudrat tashkilotlarini aniqlash yuzasidan tender (tanlov) savdolariga e’lon berilgan.

Muhokamalar davomida senatorlar hududlarda olib borilayotgan ishlarni yanada kuchaytirish zarurligiga e’tibor qaratdi.

Xususan, 2022—2023-yillarda mahallalar infratuzilmasini rivojlantirish bo‘yicha loyihalar dasturlarini amalga oshirish yuzasidan hududiy ishchi guruhlar rahbarlariga mahallalar kesimida alohida reja-jadvallarni tasdiqlab, dolzarb muammolar hal etilayotgani yuzasidan aholiga batafsil tushuntirish va tashviqot ishlarini tashkil etish, mahallalar infratuzilmasini yaxshilash bo‘yicha amalga oshirilayotgan ishlarning holatini tizimli o‘rganish va mavjud muammolarni hal etish vazifalari belgilab berildi.

Shuningdek, mas’ul idoralarga xalq deputatlari mahalliy kengashlari bilan birgalikda loyihalarni puxta va chuqur o‘rganish, dasturlarga kiritilgan ichimlik suvi ta’minoti va oqova suv xizmati obyektlari qurilishi uchun yer ajratish bo‘yicha viloyat hokimlari qarorlarining qabul qilinishini tezlashtirish ko‘rsatib o‘tildi.

Mutasaddilarning 2022—2023-yillarda mahallalar infratuzilmasini yanada yaxshilash borasida amalga oshiralayotgan ishlarni samarali tashkil etish, yo‘l qo‘yilgan xato-kamchiliklarning oldini olish bo‘yicha ko‘rilgan choralar bo‘yicha axboroti eshitildi.

Ko‘rib chiqilgan masala yuzasidan Senatning tegishli qarori qabul qilindi.