DXX Andijonda qiymati 42 mlrd so‘mlik loyihani olib bermoqchi bo‘lgan shaxslarni ushladi

Davlat xavfsizlik xizmati xodimlari tomonidan Andijon viloyatida 42 mlrd so‘mlik loyihani olib berish evaziga pul talab qilgan shaxslar ushlandi.

Ma’lum qilinishicha, Andijon tumanida yashovchi 58 yoshli A.B. va Andijon shahrida istiqomat qiluvchi 53 yoshli X.U. o‘zaro til biriktirib, yo‘l qurilishi sohasida faoliyat yurituvchi MCHJ rahbarining ishonchiga kirgan.

Ular yuqori lavozimda ishlovchi tanishlari orqali, MCHJga Asaka tumanidagi “4R-112” avtomobil yo‘lining 4 kilometr qismiga asfalt-beton qoplamasini yotqizish bo‘yicha loyihani olib berish evaziga, loyiha uchun ajratiladigan 42 milliard so‘mning 10 foizini (4,2 milliard so‘m) berishini talab qilgan.

Davlat xavfsizlik xizmati va Bosh prokuratura huzuridagi departament xodimlari tomonidan Andijon shahrida o‘tkazilgan tezkor tadbirda A.B. so‘ralgan pul mablag‘i hisobidan 20 ming dollar olgan vaqtida ashyoviy dalillar bilan ushlandi.

Hozirda mazkur shaxslarga nisbatan Jinoyat kodeksining 168 (firibgarlik) va 28, 211-moddalari (pora berish) bilan jinoyat ishi qo‘zg‘atilib, qamoq ehtiyot chorasi qo‘llanilgan.

Eslatib o‘tamiz, 2023-yilning may oyida Namanganda 1 gektar yerni tenderda yutib berish uchun 10 ming dollar so‘ragan mansabdor ushlangan edi. Oktyabr oyida esa Xorazmda faoliyat boshlaganiga 4 kun bo‘lgan firma tenderdagi 5 ta tanlovda g‘olib bo‘lib, 1 milliard so‘mdan ortiq mablag‘ni qo‘lga kiritgani ma’lum bo‘lgandi.