Boshlang‘ich narxi 29,7 milliard so‘mlik davlat xaridlarida qonun buzilishiga yo‘l qo‘ygan Urganch davlat universitetiga nisbatan tegishli chora ko‘rildi, deb xabar bermoqda Raqobat qo‘mitasi matbuot xizmati.
Qo‘mitaning Xorazm viloyati hududiy boshqarmasi viloyat prokuraturasining topshirig‘iga asosan Urganch davlat universiteti tomonidan davlat xususiy sherikchiligi asosida 7 qavatli, 600 o‘rinli talabalar turar joyi binosi qurilishi bo‘yicha boshlang‘ich narxi 29,7 milliard so‘m bo‘lgan tender savdosi yuzasidan o‘rganish ishlarini o‘tkazgan.
O‘rganishlar davomida universitet tomonidan Xorazm viloyati qurilishda tanlov savdolarini tashkil etish konsalting markaziga yuborilgan anketada “7 qavatli, 600 o‘rinli talabalar turar joyi binosi qurilishi” obyektini sohaviy mansubligi va xavf-xatar toifasi II toifa qilib belgilangani maʼlum bo‘lgan.
Vazirlar Mahkamasining 2020-yil 20-avgustdagi qaroriga asosan, 9 qavatgacha bo‘lgan Oliy taʼlim muassasalari III toifa sifatida “Shaffof qurilish” milliy axborot tizimiga joylashtirilishi lozimligi qayd etilgan.
Ammo Urganch davlat universiteti tomonidan III toifa sifatida “Shaffof qurilish” milliy axborot tizimiga joylashtirilishi lozim bo‘lgan obyektni II toifa qilib belgilashi natijasida boshqa viloyatdagi qurilish tashkilotlarining tenderda ishtirok etishi cheklangan.
Qayd etilishicha, yuqoridagilarga asosan, hududiy boshqarma Maxsus komissiyasi tomonidan Urganch davlat universitetiga nisbatan “Raqobat to‘g‘risida”gi qonunning 29-moddasi talablari buzilishi yuzasidan belgilangan tartibda ish qo‘zg‘atilib, natijasi yuzasidan buyurtmachi tashkilot mansabdor shaxsiga nisbatan maʼmuriy javobgarlik belgilash yuzasidan tegishli sud organiga maʼlumotlar yuborildi.
Shuningdek, qonun buzilishi holatini bartaraf etish va kelgusida yo‘l qo‘ymaslik yuzasidan ko‘rsatma berildi.
Izoh (0)