Isroil mudofaa kuchlari Livan janubidagi shia “Hizbulloh” harakatining raketa bo‘linmasi qo‘mondoni Ali Tavfiq Duvaykning yo‘q qilinganini e’lon qildi.
“Isroil armiyasi Livan janubidagi Kfar Juz hududida “Hizbulloh”ning o‘rta masofaga uchuvchi raketa bo‘linmasi qo‘mondoni Ali Tavfiq Duveykka zarba berdi va o‘ldirdi”, deyiladi xabarda.
Hisobotda qayd etilishicha, Duveyk Isroilning shimoliy va markaziy qismiga 300 dan ortiq raketa uchirilishi uchun mas’ul bo‘lgan.
Isroil 1-oktyabrdan beri Livan janubida “Hizbulloh” kuchlariga qarshi quruqlikdagi operatsiya o‘tkazmoqda va qo‘shni davlatni havodan bombardimon qilmoqda.
Isroildagi harbiy kampaniyaning asosiy maqsadi bir yil avval “Hizbulloh” tomonidan Falastinning HAMAS harakatini qo‘llab-quvvatlash uchun boshlagan o‘qqa tutilishi sababli evakuatsiya qilingan shimoldagi 60 ming aholisini vatanga qaytarish uchun sharoit yaratishdan iborat.
Avvalroq The Jerusalem Post nashri Isroil mudofaa kuchlari Livanda quruqlikdagi operatsiya boshlanganidan beri birinchi marta bu hududga og‘ir artilleriyani joylashtirgani haqida xabar bergan edi
Nashr maʼlumotlariga ko‘ra, yakshanbaga o‘tar kechasi 36-diviziyaning artilleriya bo‘linmalari chegaradan o‘tgan.
Gazetaning yozishicha, ular hozirda chegara hududlarida “Hizbulloh” harakatining ikkinchi mudofaa chizig‘iga bostirib kirgan Isroil qo‘shinlariga yordam berishi rejalashtirilgan. The Jerusalem Post ta’kidlaganidek, gap Isroil mudofaa kuchlarining 411-batalyoni bo‘linmalari haqida ketmoqda.
12-noyabr kuni Isroil Livanda quruqlikdagi operatsiyaning ikkinchi bosqichini boshlaganini e’lon qilgandi.
Operatsiyadan maqsad “Hizbulloh”ning raketa qurollarini yo‘q qilish, shuningdek, guruhga qo‘shimcha bosim o‘tkazishdir, deya xabar bergan Isroil armiyasi.
Qayd etilishicha, Isroil harbiy kuchlari nafaqat Livan janubida, balki Bayrut va Bekaa vodiysida ham harakat qilib, “Hizbulloh”ning qurol-yarog‘ omborlarini yo‘q qilmoqda. So‘nggi bir oy ichida “Hizbulloh” Isroil hududiga 90 ga yaqin dron uchirgan, ularning aksariyati tutib olingani aytilmoqda.
Izoh (0)