Livanning “Hizbulloh” harakati harbiylari Isroilning Safad chekkasida joylashgan Vilon harbiy bazasiga dronlar guruhi bilan hujum qildi. Bu haqda harakat matbuot xizmati xabar berdi.
“Islomiy qarshilik jangchilari Safad shahri sharqida 36 va 210-diviziyalarning strategik zaxira bazasida kamikadzelar guruhiga hujum qildi”, deyiladi xabarda.
Bayonotga ko‘ra, mo‘ljallangan nishonlarga aniq zarbalar berilgan. Isroil armiyasi avvalroq Livanning “Hizbulloh” harakati ancha zaiflashgan degan xulosaga kelgan edi.
“Biz ‘Hizbulloh’ning qo‘mondonlik tuzilmasini butunlay yo‘q qildik, endi janglarni to‘xtatish mumkin”, dedi Isroil armiyasi bosh shtabi boshlig‘i Gerzi Halevi.
Sentyabr oyi oxiridan beri Isroil armiyasi Livandagi “Hizbulloh” nishonlariga yerdan va havodan zarbalar berib kelmoqda.
Axios nashri Isroil AQSHga Livan bilan bog‘liq vaziyatni diplomatik yo‘l bilan tartibga solish shartlari yozilgan hujjatni topshirgani haqida xabar bergan edi.
Nashr manbalariga ko‘ra, talablardan biri Isroil mudofaa kuchlarining “Hizbulloh”ni qayta qurollantirishga va Livan janubidagi hududlarda guruhning harbiy infratuzilmasini tiklashga qarshi faol choralar ko‘rish imkoniyatiga ega bo‘lishdir.
Shuningdek, Isroil o‘zining havo kuchlari Livan havo hududida erkin harakat qilishini talab qilgan. Axios’ning qayd etishicha, bu ikki talab BMT Xavfsizlik kengashining 1701-rezolyutsiyasiga ziddir.
Izoh (0)