Isroil mudofaa kuchlari Livanda “Hizbulloh”ning raketa imkoniyatlarini yo‘q qilishga qaratilgan quruqlikdagi operatsiyaning ikkinchi bosqichini boshladi.
Bu haqda Isroilning “Maariv” gazetasi armiyadagi manbalarga tayanib xabar berdi.
“Livan janubida quruqlikdagi operatsiyaning ikkinchi bosqichi boshlandi, operatsiyadan maqsad ‘Hizbulloh’ning raketa qurollarini yo‘q qilish, shuningdek, guruhga qo‘shimcha bosim o‘tkazishdir”, deyiladi xabarda.
90 ga yaqin dron
Qayd etilishicha, Isroil harbiy kuchlari nafaqat Livan janubida, balki Bayrut va Bekaa vodiysida ham harakat qilib, “Hizbulloh”ning qurol-yarog‘ omborlarini yo‘q qilmoqda. So‘nggi bir oy ichida “Hizbulloh” Isroil hududiga 90 ga yaqin dron uchirgan, ularning aksariyati tutib olingani xabar berilmoqda.
Isroil 1-oktyabrdan beri Livan janubida “Hizbulloh” kuchlariga qarshi quruqlikdagi operatsiya o‘tkazmoqda va qo‘shni davlatni havodan bombardimon qilmoqda.
Kats bayonoti
Kecha, 11-noyabr kuni Isroilning yangi mudofaa vaziri Isroil Kats “Hizbulloh” allaqachon mag‘lub bo‘lganini aytib o‘tdi.
“ ‘Hizbulloh’ yetakchisi Hasan Nasrullohning Isroil armiyasi tomonidan sentyabr oyi oxirida yo‘q qilinishi Isroilning Livan islomchilariga qarshi kurashida asosiy yutug‘iga aylandi”, dedi mudofaa vaziri.
“Bizning vazifamiz bu g‘alabaning mevasini olish uchun bosimni davom ettirishdir”, dedi Kats.
Uning so‘zlariga ko‘ra, Isroil Livanning ichki siyosatiga aralashishdan manfaatdor emas.
“Diplomatik kelishuv bo‘lmaydi”
“Hizbulloh” guruhining yangi tayinlangan rahbari Naim Qosim Isroil bilan diplomatik kelishuv bo‘lmasligini aytdi.
“Urush Isroil Livanga qarshi tajovuzini to‘xtatgandagina tugaydi va shundagina biz Livan parlamenti rahbari Nabix Berri vositachiligida bilvosita muzokaralarga rozi bo‘lamiz”, dedi Naim Qosim.
Izoh (0)