Ukraina harbiy dronlari 28-iyul kuni kechqurun Rossiyaning Kursk viloyatiga hujum uyushtirdi. Bu haqda Sharqiy Yevropa nashrlariga tayanib, Reuters xabar berdi.
Manbada aytilishicha, Ukraina hujumni seriyali tarzda amalga oshirgan, 20 dan ortiq harbiy dronlar qo‘shni davlat hududiga kirgach, Kursk viloyatining ko‘plab hududlarini nishonga olgan.
Rasmiylar hujum oqibatida Kurskdagi mahalliy neft omboriga shikast yetkazilganini xabar qilgan. Omborning bir nechta qismlarida yong‘in kelib chiqqan va tezlikda atrofga tarqala boshlagan. Qutqaruv brigadalari hozirga qadar alangani o‘chira olmagan.
Kursk viloyati gubernatori Andrey Smirnov dronlar hujumi ro‘y berganini tasdiqlagan. Tungi hujumning dastlabki soatlaridayoq 13 ta dron yo‘q qilingan. Tongga qadar esa havo mudofaa tizimlari jami 19 ta dronni urib tushirgan. Viloyatda vaziyat tiklangan.
Smirnovning so‘zlariga ko‘ra, hujumlar bir necha turar joy binolariga kichik zarar yetkazgan. Aholi orasida shikastlanishlar va elektr tarmoqlarida uzilishlar yo‘y bergan.
Manbada aytilishicha, so‘nggi paytlarda Ukraina Rossiya hududidagi energiya inshootlari, omborlar, transport va harbiy infratuzilmaga zarba berishni ko‘paytirgan. Bu hujumlardan maqsad esa Kreml iqtisodiyoti va urushni moliyalashtirish qobiliyatini yo‘q qilishdir.
Ukraina dronlar hujumi dushanba tongida Oryol va Bryansk viloyatlarida ham kuzatilgan. Oryoldagi hujumda mintaqaviy elektr stansiyasiga jiddiy shikast yetgan. Bryansk viloyatida esa davlat muassasalari nishonga olingan.
Kiyev hukumati dron hujumlari Rossiyaning Ukrainani bombardimon qilishda davom etishiga qarshi javob chorasi ekanini aytgan. Rossiya tinch aholiga hujum qilishni davom ettirsa, Ukraina dron hujumlari ham faollashishi xabar qilingan.
Izoh (0)