Буюк Британия ҳукумати Украина учун ҳужум ва разведка дронларини сотиб олишга тахминан 9,5 миллион доллар ажратмоқчи.Бу ҳақда Британия ҳукумати матбуот хизматига таяниб, “РБК-Украина” хабар берди.
“Ҳукумат янги ҳужум ва кузатув дронларини харид қилиш учун 7,5 миллион фунт стерлинг (9,5 миллион доллар) миқдоридаги қўшимча ҳарбий ёрдамни эълон қилмоқда”, дейилади баёнотда.
Қайд этилишича, дронлар Украинага Буюк Британия ва Латвия бошчилигидаги Киев учун дронларни биргаликда харид қилаётган давлатлар коалицияси орқали етказиб берилади.
Аниқлик киритилишича, Украина учун дронлар харид қилишга берилаётган маблағ молиялаштириш фондидан ажратилган.
Шу билан бирга, ҳукумат дрон коалицияси яна 16 миллион фунт стерлинг (20 миллион доллардан ортиқ) олишини таъкидламоқда. Хусусан, пулни қуйидагилар ажратган: Германия (10 миллион фунт ёки 12 700 миллион доллар); Канада (3 миллион фунт ёки 3,8 миллион доллар); Люксембург (3 миллион фунт ёки 3,8 миллион доллар). Бу дрон коалициясининг умумий фондини 67 миллион фунт стерлингга (85 миллион доллардан ортиқ) етказади.
Дрон коалиция жамғармаси дронларни сотиб олиш ва кейин уларни украиналик ҳарбийларга юбориш учун яратилган. Жамғарма ташкил этилганда, унга тахминан 45 миллион евро маблағ ажратилиши таъкидланганди.
Аввалроқ Германия Украинага навбатдаги ҳарбий ёрдам доирасида Helsing компанияси томонидан ишлаб чиқарилган сунъий интеллектга эга 4000 та дрон етказиб бермоқчи экани айтилганди.
Мini-Taurus номли учувчисиз учиш қурилмалари замонавий тизимларга эга. Бу эса уларни Россиянинг электрон уруш тизимларига қарши бардошли қилади. Бундан ташқари, дрон қийин об-ҳаво шароитида ҳам рельефни таҳлил қилиш ва жойлашувни аниқлаш имконига эга.
Шунингдек, Нигерия мамлакати ҳам ўзининг разведка ва ҳужумчи дронларини ишлаб чиқаришни бошлагани хабар қилинганди.
Мазкур дронларнинг энг каттаси юкларни 20 км гача бўлган масофага етказиш учун мўлжалланган бўлиб, максимал учиш оғирлиги 55 кг ни ташкил қилади.
Изоҳ (0)