Germaniya Ukrainaga navbatdagi harbiy yordam doirasida Helsing kompaniyasi tomonidan ishlab chiqarilgan sun’iy intellektga ega 4000 ta dron yetkazib bermoqchi. Bu haqda Bild xabar berdi.
Mini-Taurus nomli uchuvchisiz uchish qurilmalari zamonaviy tizimlarga ega. Bu esa ularni Rossiyaning elektron urush tizimlariga qarshi bardoshli qiladi. Bundan tashqari, dron qiyin ob-havo sharoitida ham relyefni tahlil qilish va joylashuvni aniqlash imkoniga ega.
“RBK Ukraina” nashri insayderlariga ko‘ra, dekabrdan boshlab har oy bir necha yuzlab dronlar yetkazib beriladi. Hozir bir nechta namunalar Ukraina sharqida jangovar sinovlardan o‘tkazilmoqda. Sun’iy intellekt dronga operator bilan aloqa yo‘qolgan taqdirda ham missiyani mustaqil davom ettirish imkonini beradi. Bu esa zarbaning aniqliligini sezilarli darajada oshiradi.
Germaniya mudofaa vaziri Boris Pistoriusning ta’kidlashicha, Ukraina ushbu dronlardan qo‘mondonlik punktlari va logistika markazlari kabi muhim nishonlarga qarshi samarali foydalanishi mumkin. Vazir Germaniya kelgusida Bundesverni ham xuddi shunday texnologiyalar bilan ta’minlashini aytdi.
Germaniyaning Ukrainaga harbiy yordami
Germaniya Ukrainaning donor davlatlari ichida Qo‘shma Shtatlardan so‘ng ikkinchi o‘rinda turadi. Birgina 2024-yil uchun Germaniya byudjetidan Ukrainaga harbiy yordamga 8 milliard yevroga yaqin mablag‘ ajratilgan. Mamlakat Ukrainani Leopard 2, Leopard 1A5 tanklari, Marder piyoda jangovar mashinalari hamda IRIS-T havo mudofaa tizimlari bilan ta’minlab kelmoqda.
Izoh (0)