O‘zbekiston milliy terma jamoasining sobiq futbolchisi Nikolay Shirshov 28-dekabr kuni 47 yoshida vafot etdi. Shirshovni o‘rta yoshdagi futbol muxlislari yaxshi eslaydi. U O‘zbekiston milliy terma jamoasi tarkibida to‘p surgan paytlari chap qanotning haqiqiy qiroli edi. Shirshovning chap oyoqda beradigan kuchli zarbalari har qanday mohir darvozabonni qiyin ahvolga solib qo‘yardi.
“Daryo” O‘zbekiston terma jamoasi sobiq futbolchisining eng yorqin o‘yinlari va gollarini yodga oldi.
JCh—1998 saralashi, 2-bosqich. 1997-yil 27-sentabr
O‘zbekiston — BAA 2:3
Bu o‘yin O‘zbekiston milliy terma jamoasi uchun juda muhim uchrashuv edi. Ilk bor Jahon Chempionati saralashida qatnashayotgan O‘zbekiston saralashning birinchi bosqichidan osonlik bilan o‘tdi. Ammo ikkinchi bosqichda Yaponiya, Janubiy Koreya kabi Osiyo grandlariga imkoniyatni boy berdi. Shuningdek, qo‘shni Qozog‘iston bilan durang o‘ynadi. Bu uchta o‘yin safarda o‘tkazilgan edi. BAAga qarshi bahs 2-saralash bosqichining O‘zbekistonda o‘tgan dastlabki uchrashuvi bo‘ldi. O‘shanda “Paxtakor” stadioni muxlislar bilan to‘lib-toshgan. Barcha terma jamoadan chiroyli o‘yin va g‘alaba kutayotgandi.
Jarohatidan tuzalib, safga qaytgan Mirjalol Qosimovning asosiy tarkibda o‘yinni boshlashi ham muxlislarga qo‘shimcha ishonch baxsh etgandi. Milliy terma jamoa o‘yinni ajoyib boshladi. Nikolay Shirshov 10-daqiqada chap oyoqda yo‘llagan kuchli zarbasi bilan hisobni ochdi. “Paxtakor” stadioni “portladi”. 37-daqiqada o‘zbekistonliklar penalti ishladi. Mirjalol Qosimov 11-metrlik nuqtaga yaqinlashdi va imkoniyatni ko‘kka sovurgan holda “Roberto Badjo izdoshlari klubi”ga qo‘shildi. Shundan so‘ng O‘zbekistondan omad yuz o‘girdi. Shuhrat Maqsudovning chetlatilishi, ikkinchi bo‘limda 3 ta gol o‘tkazib yuborilishi, alamli mag‘lubiyat va yo‘qotilgan qimmatli 3 ochko. O‘yin terma jamoa uchun muvaffaqiyatsiz yakunlangan bo‘lsa ham Nikolay Shirshov uni yaxshi o‘tkazgandi. Uning chiroyli goli o‘shanda millionlab futbol muxlislariga quvonch va umid baxsh etgandi.
JCh—2002 saralashi, 1-bosqich. 2001-yil 27-aprel
O‘zbekiston — Iordaniya 2:2
JCh—2002 saralashida O‘zbekiston milliy terma jamoasi 1-bosqichdayoq muammoga duch keldi. Bu “muammo”ning nomi Iordaniya edi (keyinchalik bu terma jamoa bizga eng noqulay raqib bo‘lishini o‘shanda hech kim bilmasdi). Iordaniya bilan safarda kechgan o‘yinning 1-bo‘limidayoq O‘zbekiston bir yo‘la ikkita gol o‘tkazib yubordi. Vaziyat jiddiy, hech kim bu raqibdan bunday o‘yin kutmagandi. Ikkinchi bo‘limda O‘zbekiston futbolchilar vaziyatni o‘nglashga harakat qildi va buni qisman uddaladi ham. Bunda Nikolay Shirshovning hissasi katta bo‘ldi. Dastlab, 53-daqiqada Vladimir Maminov penaltidan hisobni qisqartirdi. Keyin esa 65-daqiqada Nikolay Shirshov o‘zining sevimli chap oyog‘ida zarba yo‘llab, hisobni tenglashtirdi.O‘zbekiston mag‘lubiyatdan qutulib qoldi. Safardan hech yo‘g‘i 1 ochko bilan qaytildi.JCh—2002 saralashi, 2-bosqich. 2001-yil 19-oktabr
O‘zbekiston — Xitoy 1:0
JCh—2002 saralashining so‘nggi bosqichida O‘zbekiston qiynaldi. Xitoy guruhning yaqqol favoriti sifatida namoyon bo‘lib, mundialga to‘g‘ridan-to‘g‘ri yo‘llanmani qo‘lga kiritdi. Ammo Toshkentda kechgan bahsda O‘zbekiston milliy terma jamoasi ana shu guruh favoriti bo‘lgan Xitoyni yengishga muvaffaq bo‘lgandi. Yagona golni o‘shanda Nikolay Shirshov o‘z uslubida — chap oyoqdagi kuchli zarbasi evaziga kiritgandi. O‘shanda futbolchilar parallel ravishda kechayotgan guruhdagi yana bir o‘yin: BAA – Ummon uchrashuvi natijasini hali bilmasdi. Shu sababli Xitoy ustidan qozoniladigan g‘alaba o‘tish o‘yinlariga yo‘llanma beradi deb hisoblab, Shirshovning golidan keyin rosa quvongandi. Ayniqsa, Nikolayning o‘zi tribuna panjarasiga chiqib olib, golni tomoshabinlar bilan birga yosh bolalardek nishonlagani ko‘pchilik muxlislarning yodida bo‘lsa kerak. Ammo O‘zbekiston o‘shanda guruhda 3-o‘rinni olib, JCh bilan xayrlashdi.
Nikolay Shirshov O‘zbekiston milliy terma jamoasida juda chiroyli o‘yinlar o‘tkazgan bo‘lsa ham, u ishtirok etgan uchrashuvlarning aksarida terma jamoaga omad kulib boqmagan. Shirshov ham ko‘plab o‘zbekistonlik futbolchilar qatorida mundial armoni bilan yashab, futboldan ketdi. Bugun esa bu yorug‘ olamni ham tark etdi.
Uning milliy terma jamoadagi statistikasi quyidagicha bo‘ldi:
- O‘yinlar soni — 63 ta
- To‘liq o‘tkazgan o‘yinlar soni — 41 ta
- Gollar soni — 13 ta
- Sariq kartochka — 16 ta
Yoqubjon Bobojonov tayyorladi
Izoh (0)