“O‘yindan faqat g‘alaba kutmoqdamiz va bunga majburmiz. Boshqa natija kutish bizni Jahon chempionatidan mahrum qilishi mumkin. Xuddi avvalgi saralashlardagi kabi imkoniyatlarimiz juda yuqori. Biz Qatardan barcha nuqtalarda kuchlimiz va buni maydonda ko‘rsatishimiz shart”, deya fikr bildirdi 33 yoshli futbolchi.
Uning fikricha, O‘zbekiston terma jamoasi Qatardan har jihatdan kuchli va Osiyo Kubogidan so‘ng o‘sishga erishdi.
“Osiyo Kubogidan so‘ng oradan 8 oy o‘tdi. Terma jamoamiz bu vaqt ichida o‘sishga erishdi. Buni inobatga olgan holda Qatarni taslim qilishimiz kerak. Terma jamoamizda hamma narsa joyida.
Ular xorijlik va mahalliy futbolchilar evaziga ancha o‘sdi. Shuning uchun Osiyo Kubogida bizga qiyin bo‘lgandi. Ochig‘ini aytganda o‘sha turnirda yomon ko‘rsatmagandik, o‘yin tomonlama eng yaxshisi edik. Penaltilar seriyasiga tayyorlanmaganimiz pand bergandi”, deydi hujumchi.
“Navbahor” klubi futbolchisi qatarlik hujumchilar va O‘zbekiston termasi futbolchilariga to‘xtaldi.
“Akram Afif hozir yaxshi formada. Lekin uni to‘xtatish bizning himoyachilarga qiyin emas. Husanov, Aliqulov uni zararsizlantirishga 50 foiz kuchini sarflasa kifoya. Hujumdagi futbolchilarimizga ko‘proq uzoqdan zarbalar berishini ta’kidlagan bo‘lardim. Qatar darvozabonlari uzoqdan zarbalarda ko‘p xatolarga yo‘l qo‘yishadi. Buni ichki chempionatda ham ko‘rish mumkin” deydi Sardor Rashidov.
Ma’lumot uchun, Rashidov O‘zbekiston terma jamoasi safida 48 o‘yinda qatnashib, 12 bor raqiblar darvozasiga yo‘l topgan. 2015-yil Saudiya Arabistoniga qarshi uchrashuvda hujumchi 2 bor raqiblar darvozasini ishg‘ol qilgan.
Bundan tashqari, Sardor uch bora O‘zbekiston chempionati, shuncha bor O‘zbekiston kubogi va bir marta O‘zbekiston Superkubogida g‘alaba qozongan.
Izoh (0)