Futbol bo‘yicha Jahon chempionati saralashining 3-bosqichidan o‘rin olgan Qirg‘iziston—O‘zbekiston uchrashuvi 10-sentyabr kuni bo‘lib o‘tdi.
Shiddatli kechgan o‘yinda O‘zbekiston milliy jamoasi 3:2 hisobida g‘alaba qozondi.
Sofascore nashri uchrashuvda qatnashgan futbolchilarni baholadi.
Unga ko‘ra, O‘zbekiston milliy jamoasi sardori, uchrashuvning eng yaxshi o‘yinchisi Eldor Shomurodovning harakatlari 8,4 ballga baholandi. Birinchi bo‘limga qo‘shib berilgan daqiqalarda bosh bilan ajoyib zarba yo‘llab, hisobni tenglashtirgan Husniddin Aliqulov 8 ballga loyiq ko‘rilgan. Hal qiluvchi golni kiritgan Oston O‘runovga esa portal tomonidan 7,9 ball qo‘yildi.
O‘zbekiston jamoasi darvozaboniga Sofascore eng past bahoni qo‘ygan — 6,3 ball.
Qirg‘iziston jamoasi safida ikkinchi golni kiritgan Odiljon Abdurahmonovning o‘yini yuqori baholangan — 7,5 ball. “Dinamo” futbolchisi Kojo 7,3 ballga loyiq ko‘rildi. Aynan u mezbonlarning birinchi goliga mualliflik qildi.
Jamoaning o‘ng qanot himoyachisi Mishchenko eng past — 6,0 ball qo‘yilgan.
Ushbu g‘alabadan so‘ng O‘zbekiston jamoasi 6 ochko to‘plab guruhda Eron bilan birgalikda peshqadamlikni saqlab turibdi. Ushbu jamoalar 3-tur doirasida uchrashadi. Bahs 10-oktyabr kuni Toshkentda bo‘lib o‘tadi.
Izoh (0)