AQSh sobiq prezidenti Donald Tramp Amerika qo‘shinlarining uning davomchisi Jo Bayden rahbarligi ostida Afg‘onistondan olib chiqib ketilishini “AQSh uchun eng katta haqorat” deb atadi. Bu haqda Reuters xabar bermoqda.
“Baydenning Afg‘onistondan omadsiz ravishda ketishi — millat yetakchisi qobiliyatsizligining, ehtimol, butun tarix davomidagi eng hayratlanarli tarzda namoyon bo‘lishi”, — dedi Tramp Alabamada o‘z tarafdorlari qarshisida nutq so‘zlayotib.
Sobiq prezidentning fikricha, Bayden Afg‘onistondagi operatsiyani yakunlash bo‘yicha Tramp davrida ishlab chiqilgan rejadan voz kechib xato qilgan. “Oqibatda bu qo‘shinlarni chiqarib ketish emas, kapitulyatsiya (taslim bo‘lish) bo‘lib qoldi”, dedi Tramp.
“Biz obro‘ bilan chiqib ketishimiz mumkin edi, — deya qo‘shimcha qildi Tramp. — Biz izzat-hurmat bilan chiqib ketishimiz kerak edi. Buning o‘rniga esa obro‘ning teskarisiga ega bo‘ldik”.
AQSh o‘zi 2001-yildan beri harbiy operatsiyani o‘tkazib kelayotgan Afg‘onistondan qo‘shinlarini olib ketish haqida bir necha marta aytgan. Qo‘shinlarni olib ketish, xususan, Trampning saylovoldi kampaniyasi bandlaridan biri bo‘lgan. Ammo 2017-yil boshida AQSh prezidenti lavozimini egallagach, Tramp Amerika kontingentini Afg‘onistondan tezkorlik bilan olib ketish haqida gap ham bo‘lishi mumkin emasligini e’lon qildi. Oxir-oqibat qo‘shinlarni olib chiqish AQShning yangi prezidenti — 2020-yil kuzidagi prezident saylovida Tramp ustidan g‘alaba qozongan demokrat Jo Bayden davrida boshlandi.
Bayden qo‘shinlarni olib ketishni 2021-yil 11-sentabrga qadar yakunlashni rejalashtirgan edi, biroq amerikaliklar Afg‘onistonni tark etishni boshlaganidan keyin darhol deyarli butun mamlakat “Tolibon” hukmronligi ostiga o‘tdi. 15-avgust kuni harakat Kobulni nazorat ostiga oldi, prezident Ashraf G‘ani mamlakatdan qochib ketdi. “Tolibon” hokimiyat tepasiga kelganidan keyin minglab odamlar Afg‘onistonni tark etishga urinmoqda, Kobul aeroportida shu paytgacha kamida 12 kishi halok bo‘lgan.
Avvalroq AQShning Kobuldagi elchixonasi xodimlari Davlat departamentini Amerika qo‘shinlari olib chiqilgach, ko‘p o‘tmay Afg‘onistonda hokimiyat qulashi mumkinligi haqida oldindan ogohlantirgani ma’lum bo‘lgan edi. The Wall Street Journal manbalari qayd etishicha, Amerika diplomatlari o‘sha vaqtda Afg‘oniston hukumat kuchlari radikallarga qarshilik ko‘rsata olmasligi mumkin, degan fikrda bo‘lgan.
Izoh (0)