Quyida Gollivud kinoindustriyasida ishlaydiganlarning o‘rtacha maoshi haqida ma’lumot beramiz. Ammo kimdir bundan bir necha barobar ko‘p, kimdir esa kamroq olishi mumkin. Bu nafaqat tajribaga, balki insonning qobiliyatlari va hamkorlik qilayotgan kompaniyasiga ham bog‘liq.
Muharrir
Muharrirsiz na kino, na teleserial yoki shoularni tasavvur qilib bo‘lmaydi. U yozilgan ssenariyni tahrir qilib, unga tuzatishlar kiritadi. Yodda tutingki, ssenariynavis va muharrir — bu bir xil kasb emas. Ammo ular bir-birisiz mavjud bo‘la olmaydi. Gollivudda muharrirlarning ko‘pchiligi haftasiga taxminan 4200 dollar maosh oladi. Lekin Disney kabi yirik kompaniyalarda muharrirlar haftasiga 20-25 ming dollar daromad olishadi.
Kinopublitsist (publitsist)
Aslida kino va seriallar olamida publitsistlar deb PR mutaxassislarini aytishadi. Ular nafaqat reklama va jamoatchilik bilan aloqalar yo‘nalishi bo‘yicha, balki jurnalistika bo‘yicha ham tegishli ta’lim olgan bo‘ladi. Ular yangi mahsulotlarni omma orasida targ‘ib qilish uchun mas’uldir. Ba’zilari o‘zlarining kichik firmalarini ochib, xizmatlar ko‘rsatadi va bu orqali yiliga taxminan 1 million dollar daromad oladi.
Studiya direktori
Dastlab studiya rahbari juda katta daromadga ega bo‘lmasligi mumkin, ammo bu ham qanday qarashga bog‘liq. Masalan, Paramount Pictures rahbariga yordamchi izlayotganda taklif qilinadigan ish haqi 50 ming dollardan boshlanadi. O‘sish uchun imkoniyatlar, albatta, mavjud. Studiya direktori o‘rtacha hisobda taxminan 120 ming dollar daromad oladi.
Yurist
Kino olamida haqiqiy huquqshunoslarsiz hech narsa qilib bo‘lmaydi, chunki biror aktyor yoki butun bir studiya ham sudga berilishi mumkin. Har bir bitim uchun yuristlar o‘zlariga 5 foiz komissiya olishadi, lekin mijozlardan soatlik haq olinmaydi. Ular yiliga 175 mingdan 250 ming dollargacha daromad olishadi. Yuqori maoshli mutaxassislar esa yiliga 5 milliondan 15 million dollargacha ishlab topadi.
Rejissyor
Ridli Skottdek taniqli rejissyorlar bitta to‘liq metrajli film uchun 20 million dollar ishlab topishi mumkin. Ammo boshlovchi rejissyorlar bunday katta daromadga ega bo‘lishi qiyin, ular yiliga atigi 1 million dollar, haftasiga esa 23 767 dollar miqdorida oylik maosh oladi.
Kaskadyor
Hayotini xavf ostiga qo‘yib, sog‘lig‘ini qurbon qilib, suratga olish maydonida ishlaydiganlarning maoshi kuniga 1200 dollar yoki haftasiga 4500 dollardan boshlanadi. Agar ularning mahorati yuqori bo‘lsa yoki maydonda duch keladigan xavf juda katta bo‘lsa, kaskadyorlarga ko‘proq pul to‘lanadi.
Grimyor
Professional vizajistlar odatda mashhur shaxsni ommaga taqdim qilish uchun 1000 dan 1250 dollargacha haq oladi. Bundan tashqari, ularning agentligini bron qilish uchun 20 foiz miqdorida to‘lov amalga oshiriladi.
Chiroq ustasi
Chiroq ustalari operatorlar bilan ishlaydi va kerakli yorug‘likni ta’minlaydi. O‘z mehnati uchun mutaxassislar soatiga kamida 60,59 dollar oladi, ya’ni haftasiga 3647 dollar ishlab topadi.
Yulduzning agenti
Dastlabki bosqichda agentlik vakillari yiliga atigi 80 mingdan 100 ming dollargacha maosh olishadi. Malakalarini oshirganlar esa yiliga 600 ming dollar daromad topishi mumkin.
Yaqinda Pay Up Hollywood harakati agentliklarda yordamchi xodimlarning maoshlarini biroz oshirishga yordam bergan bo‘lsa-da, ko‘pchilikning fikricha, hali ham juda past darajadagi haq to‘lanadi. Masalan, yirik agentliklardagi yordamchilar soatiga 25 dollar, fastfudda ishlovchilar esa 20 dollar maosh oladi.
Aktyor
Aktyorning maoshi, aniqroq aytganda — gonorari, uning qanchalik talabgir va mashhurligiga bog‘liq. Masalan, kichik Robert Dauni Marvel’ning yangi filmlarida Doktor Dum rolini ijro etishi uchun 80 million dollar olgan. Rayan Reynolds esa 30 million dollar oladi.
Agar seriallarda suratga tushayotgan aktyorlar haqida gapiradigan bo‘lsak, ularning gonorari taxminan har bir qism uchun 1 million dollar atrofida bo‘ladi. Shuningdek, faqatgina 400 mingdan 600 ming dollargacha oladiganlar ham bor. Seriallardagi ikkinchi darajali aktyorlar esa eng kam haq oladi. O‘rtacha hisobda ular sakkiz soatlik ish kuni uchun 216 dollardan ko‘p ololmaydi.
Prodyuser
Prodyuser bo‘lish juda foydali: ular muvaffaqiyatli bitimlar uchun deyarli har doim yettita raqamli summalarni olishadi. Agar uzoq yillardan beri ishlayotgan mutaxassislar haqida gapiradigan bo‘lsak, ular odatda 2 million dollar avans, ish tugagandan so‘ng qolgan summani olishadi. Televideniyega kelsak, ssenariy yozuvchi sifatida parallel ishlamaydigan va studiya bilan shartnoma imzolamagan prodyuserlar pilot seriya uchun gonorar olmaguncha bir tiyin ham topishmaydi. Bu gonorar odatda 15 mingdan 50 ming dollargacha bo‘ladi.
Ssenariynavis
Agar inson faqat ssenariynavis sifatida ishlasa va loyihasini kompaniyalarga sotsa, qoralamaning o‘rtacha narxi 350 mingdan 500 ming dollargacha bo‘ladi. Mashhur mualliflar qoralama ssenariy uchun 1 million dollardan ko‘proq daromad olishi mumkin. Yakuniy versiya uchun esa ssenariynavis bonus sifatida 150 mingdan 500 ming dollargacha oladi.
Bosh direktor
Turli studiyalarning bosh direktorlariga gildiyalarning ish tashlashlari ham ta’sir qilmagan. Masalan, Netflix kompaniyasining bosh direktori Ted Sarandos 2023-yilda 49,8 million dollar daromad olgan. Disney kompaniyasining bosh direktori Robert Ayger ishga qaytgan birinchi yilda 31,6 million dollar ishlab topgan. Hatto qiyin ahvolda bo‘lgan Warner Bros. Discovery kompaniyasining rahbari Devid Zaslav ham 2023-yilda 49,7 million dollar daromad qilgan.
Izoh (0)