“Tiffanydagi nonushta”, “Titanik”, “Karib dengizi qaroqchilari” va boshqa filmlarning muvaffaqiyati undagi bosh qahramon rolini ijro qilgan aktyor va aktrisalar karyerasiga ham o‘z ta’sirini ko‘rsatgan. Lekin ushbu ijodkorlar o‘rnida tamoman boshqa yulduzlar bo‘lishi ham mumkin edi.
Mettyu Makkonaxi (Jek, “Titanik”)
Aktyor kinosanoat tarixidagi eng muvaffaqiyatli filmlardan biri bo‘lgan “Titanik”da suratga tushishdan bosh tortgan. Rejissor Jeyms Kemeronning aytishicha, Jek roli taklif qilinganida Mettyu ushbu qahramon qiziqarli emas, degan fikrni bildirgan. Gvinet Peltrou esa Rouz qahramonini gavdalantirishni istamagan.
Leonardo Di Kaprio (Patrik Beytman, “Amerikalik psixopat”)
Leo “Amerikalik psixopat” filmida telba qotil rolini ijrosi uchun Kristian Beylga raqib bo‘lgan. Ularning har ikkisi ham ushbu rolni qo‘lga kiritishga qanchalik urinishiga qaramay, ijro Beylga nasib qilgan. Kristian bu haqida gap ketganida telba va aqldan ozganlar rolini gavdalantirish Leoning tashqi ko‘rinishiga to‘g‘ri kelmasligi, o‘zining qiyofasi esa bunday qahramonlar uchun ayni muddao ekanini ta’kidlagan.
Jim Kerri (Jek Chittak, “Karib dengizi qaroqchilari”)
Jonni Deppning arsenalida “Karib dengizi qaroqchilari” filmigacha ham muvaffaqiyatli ijrolar yetarli ekaniga qaramay, Jek Chittak ijrosi unga haqiqiy yulduzlik olib kelgan. Ammo Jim Kerri boshqa loyiha sabab voz kechmaganida muxlislar Jek obrazida Jonnini ko‘rmagan bo‘lardi.
Bryus Uillis (Sem, “Ruh”)
Ta’sirli sevgi hikoyasini o‘zida mujassam qilgan mazkur filmni Demi Mur va Patrik Sueyzisiz tasavvur qilib bo‘lmaydi. Ammo Sem roli Patrikka to‘satdan nasib qilgan. Gap shundaki, Bryus Uillisga suratga tushish taklif qilinganda u filmni muvaffaqiyatsiz bo‘ladi deb hisoblagan va rad etgan. Rejissorning boshi qotgan bir vaqtda film ssenariy muallifi Joel Rubin Patrikning intervyusini ko‘rib, qiziqib qolgan. Rejissor Sueyzini loyihada ishtirok etishini istamagan, ammo sinovdan keyin fikridan qaytgan.
Tim Rot (Severus Sneyp, “Garri Potter va Hikmatlar toshi”)
Professor roli uchun kelib chiqishi britaniyalik bo‘lgan Tim Rotdan yaxshiroq variant bo‘lmagan. Ammo aktyor “Maymunlar sayyorasi”da suratga tushishni afzal bilib “Garri Potter”da suratga tushishni rad etgan.
Emili Uotson (“Ameli, Ameli”)
Ushbu filmni Odri Totusiz tasavvur qilib bo‘lmasligiga qaramay, hammasi boshqacha bo‘lishi ham mumkin edi. Rejissor Jan-Pyer Jene aslida Emili Uotsonni asosiy qahramon sifatida ko‘rgan. Ammo aktrisa fransuz tilini bilmagani va boshqa loyihaga rozilik bergani rejalarni o‘zgartirib yuborgan. Tasodifan nasib qilgan rol esa Totu uchun omadli bo‘lgan.
Jeyk Jillenxol (Frodo, “Uzuklar hukmdori”)
“Uzuklar hukmdori” filmida Elayja Vud ijro qilgan qahramonni aslida Jeyk gavdalantirishi kerak bo‘lgan. Hayajoni sabab sinov vaqtida o‘zini yetarlicha ko‘rsata olmagani sabab rejissor rol ijrochisini o‘zgartirishga qaror qilgan va Jeykni eng yomon aktyor deb atagan. Jillenxolning roldan ayrilgani uning karyerasidagi muvaffaqiyatlarga ta’sir qilmagan. “Oskar” mukofotiga nomzod bo‘lgan aktyor eng talabgir kinosanoat vakili hisoblanadi.
Merilin Monro (Xolli Golaytli, “Tiffanydagi nonushta”)
Bleyk Edvardning jahon kinematografi klassikasi hisoblangan mazkur filmini Odrisiz tasavvur qilib bo‘lmaydi. Ammo Xolli Golaytli rolini Gollivudning boshqa bir yulduzi Merilin Monro ijro qilishi mumkin edi.
Izoh (0)