“Oltin globus” mukofoti sovrindori, aktyor Richard Gir AQSHni bir umrga tark etib, oilasi bilan Yevropaga ko‘chib o‘tishga qaror qildi, deb xabar bermoqda News.ru. Qayd etilishicha, aktyor rafiqasi Alexandra Silvaning vatani Ispaniyaga ko‘chib o‘tadi va u yerda ayoli qarindoshlari bilan ko‘proq vaqt ajratishiga zamin yaratadi.
Amerikaning rieltorlik agentligi vakili “Sohibjamol” filmi yulduzi Konnektikutdagi ranchosini 10,75 million dollarga sotganini tasdiqladi. Er-xotin u yerda atigi ikki yil yashagan. Yaqinda Vanity Fair Spain nashriga bergan intervyusida Richard Gir rafiqasi Silvaning vataniga qaytish istagi borligini aytgan edi.
Aprel oyida aktyor uzoq vaqtdan beri birinchi marta rafiqasi bilan omma oldida ko‘rinish berdi. Girning ayoli aktyordan 33 yosh kichik. Ular Nyu Yorkda bo‘lib o‘tgan City Harvest Gala-2024 xayriya oqshomida ishtirok etishdi. Juftlik so‘nggi marta ijtimoiy tadbirlarga o‘tgan yilning yanvar oyida tashrif buyurgan edi. Richard Gir yopiq turmush tarziga amal qilishga harakat qiladi.
Foto: Newsweek
Ma’lumot uchun, Richard Gir 1949-yilda AQSHda tug‘ilgan. Gir 1967-yilda Shimoliy Sirakuzadagi maktabni tamomlagandan so‘ng gimnastika va falsafa bilan shug‘ullangan. Richard Gir kino olamdagi faoliyati davomida “Ofitser va jentlmen”, “Men u yerda emasman”, “Xatiko: Eng sodiq do‘st” , “Chikago” kabi mashhur filmlarda suratga tushgan. Aktyor “Oltin globus”, “Emmi” va kino sohasidagi boshqa nufuzli mukofotlarni qo‘lga kiritgan.
Gir va Silva 2018-yilda turmush qurgan, ularning ikki nafar umumiy farzandlari bor. Shuningdek, har birining oldingi munosabatlaridan bir nafardan farzandi ham bor. 2019-yilda oilada birinchi umumiy merosxo‘ri dunyoga keldi. O‘sha paytda aktyor 70 yoshda edi. Oradan bir yil o‘tib oilada yana bir o‘g‘il farzand tug‘ilgan.
Izoh (0)