Oliy Majlis Qonunchilik palatasi spikeri o‘rinbosari Odiljon Tojiyev yangilangan Konstitutsiyaga asosan endilikda hokimlar mahalliy kengashlarga rais bo‘lolmasligini eslatdi.
Qayd etish lozimki, yangi tahrirdagi O‘zbekiston Respublikasi Konstitutsiyasining 120-moddasiga asosan viloyat, tuman, shahar hokimi lavozimini egallab turgan shaxs bir vaqtning o‘zida xalq deputatlari kengashining raisi lavozimini egallashi mumkin emas.
Odiljon Tojiyev hududlarda o‘tkazilayotgan mahalliy kengashlarning qo‘shma yig‘ilishlari haqida o‘z fikr-mulohazalarini bildirib o‘tgan.
“Demokratik taraqqiyot sari yana bir katta qadam tashlanmoqda. Mamlakatimiz tarixida ilk marotaba viloyat kengashlariga hokimlar raislik qilishi amalda bekor qilinib, viloyat kengashi deputatlari orasidan saylangan deputat viloyat kengashiga raislik qilishni boshladi.
Bu xalqimiz bilan maslahatlashib, 2023-yilda referendum asosida qabul qilingan yangi tahrirdagi Konstitutsiyamizning yana bir muhim normasini amalda qo‘llanilganini ko‘rsatadi.
Viloyat kengashiga raislik qilish insondan, eng avvalo, katta hayotiy tajriba talab qiladi. Bu lavozimdagi shaxs xalq dardini o‘z dardi deb biladigan, hayot sinovlarida toblangan, tegishli hududdagi masala va muammolarni yaxshi biladigan, odamlar orasida katta obro‘ga ega, shu bilan birga kun tartibiga dolzarb masalalarni qo‘ya oladigan shaxs bo‘lishi lozim.
Bugun xalq deputatlari Samarqand, Jizzax, Navoiy va Xorazm viloyatlari kengashlari sessiyalarida viloyat kengashi raislari saylandi.
Ijtimoiy tarmoqlarni kuzatar ekanmiz, o‘sha viloyatdagi jamoatchilik, hamkasblarimiz ilk saylangan kengash raislari haqida ijobiy fikrlar bildirayotganligi meni juda quvontiradi. Ayrim raislarning faoliyatini yaqindan kuzatganim uchun ham to‘g‘ri tanlov bo‘layotganligini aytishni joiz deb bilaman.
O‘ylaymanki, boshqa viloyatlarimizda ham saylanadigan kengash raislari yuqoridagi xususiyatlarga ega bo‘lgan, xalq ichidan chiqqan xalqchil odam bo‘ladi.
P.S. Yangicha tartibda saylanayotgan kengash raislari o‘z manfaatlaridan xalq manfaatlarini ustun qo‘yishiga ishonaman. Barchalariga omad!”, deb yozadi Odiljon Tojiyev.
Bundan avval prezident Shavkat Mirziyoyev 17-oktyabr kuni mahalliy davlat hokimiyati organlari faoliyatiga oid qonun hujjatlariga o‘zgartirish va qo‘shimchalar kiritishga oid qonunni imzolagani haqida xabar berilgandi.
Mazkur qonunga ko‘ra “Mahalliy davlat hokimiyati to‘g‘risida”gi qonundan viloyat, tuman, shahar hokimi bir vaqtning o‘zida tegishli hududdagi vakillik hokimiyatiga boshchilik qilishi haqidagi norma chiqarib tashlangan.
Eng asosiy o‘zgarishlardan biri — tuman (shahar, viloyat) hokimi va xalq deputatlari kengashi raisi lavozimlari bo‘lindi.
Kengashlarga saylanadigan rais boshchilik qilishiga oid o‘zgartirishlar viloyatlardagi, Toshkent shahridagi kengashlarga nisbatan saylov yakunlari bo‘yicha amalga oshirilishi belgilangan.
Tuman, shahar davlat hokimiyatining vakillik va ijro etuvchi organlariga nisbatan esa – 2026-yil 1-yanvardan e’tiboran amalga kiritiladi.
Xalq deputatlari kengashi raisi o‘z faoliyatini jamoatchilik asosida amalga oshiradi va besh yil muddatga saylanadi.
Eslatib o‘tish lozim, hozirgi vaqtga qadar hokimlar tegishli hududda vakillik (kengash) va ijro etuvchi (hukumat) hokimiyatni bir vaqtning o‘zida boshqargan, bu esa hokimiyatda qo‘llab-quvvatlash va raqobat prinsipini buzgan.
Izoh (0)