Xalq deputatlari Bo‘ka tumani kengashida deputat bloger bo‘lolmasligi haqida qaror qabul qilingan. Bu haqda sobiq deputat Xurshida Obidova Toshkent viloyati Maʼmuriy sudi majlisida maʼlum qildi, deya xabar berdi “Daryo” muxbiri.
Xalq deputatlari Bo‘ka tumani kengashining sobiq deputati Xurshida Obidova Toshkent viloyati Maʼmuriy sudiga appelyatsiya shikoyatini kiritib, Bo‘ka tumani prokurori va Xalq deputatlari tuman kengashi mansabdorlarining xatti-harakatlarini noqonuniy deb topishni so‘ragan.
“Bugungi ish bo‘yicha Nurafshon tumanlararo maʼmuriy sudining 2023-yil 8-maydagi sud majlisida ham gapirgandim, sudning o‘sha kungi qaroridan noroziligimni bildirgandim. Mening deputatlik daxlsizligimni yechish haqidagi masala meni keng jamoa oldida badnom qilib, haqoratchiga, axloqsiz ayolga chiqarishga qaratilgan masala edi. Bu masalaning tashabbuskori kengash raisi o‘rinbosari sifatida ishlab keluvchi Usmon Jo‘rayevdir. 2020-yil deputat sifatida ish boshlagan bo‘lsak, o‘sha yili 18-fevral kuni tumanga Nizomiddin Abbosov hokimlik qila boshladi. Hokim lavozimiga tayinlanishi bilan kengash raisi sifatida ham faoliyat yuritmagani uchun o‘sha yili oktabr oyigacha kengashni Usmon Jo‘rayev boshqardi. Usmon Jo‘rayev kengashga raisligi davrida men ham deputat sifatida, ham shaxsiy blog yaratib, bo‘layotgan ishlar haqida yozib bordim. Yozganlarim orasida tanqidiy chiqishlar ham bo‘lgani uchun Usmon Jo‘rayev kengash raisi sifatida ‘Deputat bloger bo‘lolmaydi’, degan tarixiy, ammo qonunga zid qaror qabul qilgandi”, — deydi sobiq deputat Xurshida Obidova.
Sobiq deputatning sudda bildirishicha, Usmon Jo‘rayev o‘sha davrda o‘z vakolatidan foydalanib, noqonuniy qarorlar qabul qilgan. Bunga qarshi chiqqan deputatni vakolatini to‘xtatib qo‘yish bilan qo‘rqitishga uringan.
Xurshida Obidovaning sudda qo‘shimcha qilishicha, u vaqtinga kengashga raislik qilgan Usmon Jo‘rayevning yer berishga oid noqonuniy xatti-harakatlari ustidan Xalq deputatlari viloyat kengashiga ham shikoyat qilgan.
“Bu holat viloyat tomonidan o‘rganib chiqilgach, Usmon Jo‘rayev tomonidan bir xil kun, bir xil son bilan chiqarilgan qonunga zid qarorlari haqida gap ketib, Usmon Jo‘rayev viloyat reglament komissiyasiga chaqirtirildi. Unga 5 kun muddat berilib, qonunga zid qarorlaringizni qonunga muvofiqlashtirib qo‘ying degan takliflar bo‘ldi. Biroq Usmon Jo‘rayev bunga eʼtibor ham bermay, yig‘ilishdan chiqib ketdi. Shunda komissiya raisi G‘ofurjon Muhammedov bu holat yaxshi gap bilan hal qilinmas ekan, shuni qonuniy o‘rganib chiqib, prokuraturaga topshiramiz dedi”, — deydi sobiq deputat.
Sobiq deputatning appelyatsiya shikoyatini ko‘rib chiqayotgan sud maʼlum muddatga tanaffus eʼlon qildi.
Avvalroq Bo‘kada deputatlarni “kalamush”, “xoin”, “hokim soldati” deb atagan boshqa deputat jarimaga tortilgani ma’lum qilingandi. Keyinchalik javobgarlikka tortilgani aytilgan sobiq deputat “Kalamushlar deganda deputatlarni nazarda tutmadim, ‘soldat’ so‘zini ham barcha deputatga emas, birgina deputatga qo‘llaganman”, deya ayblovlarga javob qaytargandi.
Izoh (0)