Boyovut tumani hokimi Dilfuza Uralova fermerlar bilan o‘tkazgan yig‘ilishda fermerlarni ko‘p yerni egallab olib, rejani bajara olmayotganlikda aybladi. Bu haqda “Kun.uz” nashri xabar berdi.
Maʼlum qilinishicha, yig‘ilish asosan hokimning fermerlarga nisbatan haqorati bilan o‘tgan. Hududdagi paxta “planini” bajarmagan fermerlar nomma-nom sanalib, ular nega terimni tashkil qilmayotgani tanqid qilingan.
“Mard bo‘lib, g‘allani ekib, maysaday qilib yurmaysanmi? Nima qilasan yerni olib, eplolmayotgan bo‘lsang tashla. 100 gektar bo‘lsa, 20 gektarga kuching yetadimi, 10 gektargami yoki 50 gektargami, bilasan-ku o‘zing necha gektarga kuching yetishini, noinsof”, degan hokim fermerlarga qarata.
Yig‘ilish jarayonida Dilfuza Uralova tumandagi “Abdumandat ota farzandlari” fermer xo‘jaligi raisi Shuhrat Hojiyevni haqorat qilgan. Bunga javoban fermer hokimdan hurmatini saqlashni so‘ragan. Hokim esa haqoratga ham qoniqmasdan, IIBga uni qamab qo‘yishni buyurgan.
Ro‘yxatni o‘qib turgan xodim “Abdumandat ota farzandlari” fermer xo‘jaligining 40 gektar paxta dalasi borligi, 109 tonna majburiyat belgilangani, hozirda 80 tonna hosil topshirganini aytgan. Shundan so‘ng hokim va fermer o‘rtasidagi suhbat shunday kechgan:
— Opa, ikkinchi terim shunday turibdi, pashti 30 gektar.
— Harom, men borib terdirib kelaymi, nega terdirmaysan? A, Nimaga?! Gap eshitish osonmi? Nega terdirib qo‘ymaysan? Nega bajarib qo‘yib kerilmaysiz?
— Bajaramiz.
— Nimaga shu vaqtgacha bajarmading?
— Shu paytgacha vaqt bo‘lgani yo‘q.
— Iye, nega vaqt bo‘lmaydi?
— Opa, vaqt bo‘lmadi, g‘alla ekdim.
Suhbat shu nuqtaga kelganida hokim fermerga kuch ishlatgan va “padaringga laʼnat, eshak”, deya haqorat qilgan. Fermer esa marhum otasini haqorat qilmaslikni so‘ragan. “Bilasanmi mening padarim qachon o‘lib ketgan? Tegma padarimga”, degan u. Hokim esa “Tegaman, yuz marta teginaman, noinsof. Iflos, nimaga qilib qo‘ymading?” deya javob qaytargan.
Janjaldan keyin fermer yig‘ilish o‘tkazilayotgan xonadan olib chiqib ketilgan. Dilfuza Uralova esa yonidagi xodimga IIBga aytishni, oyoq-qo‘lini bog‘lab olib ketib, qamab qo‘yishni buyurgan.
Maʼlumot uchun, “Fermer xo‘jaligi to‘g‘risida”gi qonunga ko‘ra, fermer xo‘jaliklarining xo‘jalik faoliyatiga davlat organlari hamda boshqa organ va tashkilotlar, shuningdek, ularning mansabdor shaxslari aralashuviga yo‘l qo‘yilmaydi.
Boyovut tumani hokimligi matbuot xizmatining “Kun.uz”ga maʼlum qilishicha, mazkur yig‘ilish 25-oktyabr kuni o‘tkazilgan.
Sirdaryo viloyati hokimligi holat yuzasidan munosabat bildirdi.
Qayd etilishicha, audioyozuvning haqqoniyligi, holat qachon, qayerda va qanday vaziyatda yuz berganiga oydinlik kiritilib, viloyat hokimligi Odob-axloq komissiyasi yig‘ilishida keskin tanqidiy muhokama etilgan.
“Komissiya tomonidan ushbu xatti-harakatlar davlat xizmatchisi etikasi va odob-axloq qoidalarini buzish deb baholandi. O‘z navbatida tuman hokimi holat bo‘yicha tushuntirish berib, yuzaga kelgan vaziyatdan pushaymonligini aytdi. Ikkinchi tomon bilan suhbatlashgani, o‘zaro munosabatlaridagi yoqimsiz hodisaga to‘liq barham berilganini bildirdi.
Hozirda yig‘ilish bayonnomasi asosida Dilfuza Uralovaga nisbatan tegishli tartibda intizomiy jazo choralarini ko‘rish uchun viloyat hokimiga taqdimnoma kiritilgan”, deyiladi hokimlik munosabatida.
Dilfuza Uralova 2020-yilning fevral oyida Boyovut tumani hokimi etib tayinlangandi. U 2012-yilda “Shuhrat” medali bilan taqdirlangan.
2022-yilning fevral oyida Boyovut tumani hokimi Dilfuza Uralova Xalq deputatlari tuman kengashining 34-sessiyasida o‘zining kengash raisi maqomini deputatlarga topshirgandi.
Izoh (0)