Toshkent viloyati hokimi Zoir Mirzayev bugun bo‘lib o‘tayotgan Oliy Majlis Qonunchilik palatasi va mahalliy kengashlar deputatlari saylovida ishtirok etib, barcha toshkentliklarni saylovga chorladi. Shuningdek, bu saylovda mening ovozim nimani hal qiladi deguvchilarga ham yuzlandi. Bu haqda saylov jarayonini kuzatgan “Daryo” jurnalisti xabar berdi.
Ma’lum bo‘lishicha, Toshkent viloyati hokimi Zoir Mirzayev Nurafshon shahridagi 7-saylov uchastkasida fuqarolik huquqidan foydalanib, o‘zi munosib deb bilgan nomzodlarga ovoz bergan.
Bugun aholida ko‘tarinki kayfiyatni ko‘ryapmiz. Sababi mana shunaqa formatdagi ya’ni yangilangan Konstitutsiyadan keyin dunyo standartlariga javob beradigan majoritar-proporsional tarzdagi saylovlar o‘tkazilishi O‘zbekiston tarixida birinchi marotaba bo‘lyapti. Xalqimiz shuni chuqur his qilgan holda O‘zbekistonning keyingi besh yillik kelajagiga, ertangi kuniga, farzandlari taqdiriga befarq bo‘lmay bugun saylovda ovoz bermoqda, — dedi saylovda ovoz bergan viloyat rahbari.
Toshkent viloyati hokimining aytishicha, saylovga tayyorgarlik jarayonida aholida tug‘ilgan ko‘plab savollar va ularga javob olinishi, odamlarning huquqiy ongi o‘sib borishidan dalolat beradi.
Saylovgacha bo‘lgan jarayon Ommaviy axborot vositalarida juda keng yoritildi. Bu aholining huquqiy ongi o‘sishiga turtki bo‘ldi. Bugungi saylovda oilaviy ishtirok etib, ovoz berdik. Toshkent viloyati aholisini ham saylovda faol bo‘lishga chorlab qolaman, — deydi hokim.
Zoir Mirzayev “Daryo” jurnalistining savoliga javob qaytarar ekan, “Saylovda bir mening ovozim nimani hal qiladi degan insonlar kelajagiga bafarq insonlar, biz ular bilan yanayam ko‘proq ishlashimiz va ularga tushuntirishimiz kerak”, dedi.
Saylovda ovoz berish, deputat saylash huquqi ko‘pchilik uchun balki kichkina huquqdir, lekin bu bepul ta’lim olish, bepul davolanish, pensiya olish kabi bir qator huquqlardan kam bo‘lmagan va o‘shalarning zaminini hal qilib beruvchi saylov, — deydi viloyat rahbari.
Izoh (0)