Toshkent viloyatining Bo‘ka tumanida Xalq deputatlari tuman Kengashi deputatlarini “kalamush”, “xoin”, “hokim soldati” deb atagan boshqa deputat javobgarlikka tortilgani maʼlum qilindi. Bu haqda viloyat hokimi Zoir Mirzayev qabulida bo‘lgan deputatlar gapirib berdi.
Maʼlum bo‘lishicha, Xalq deputatlari Bo‘ka tuman Kengashining sobiq deputati Xurshida Obidova boshqa deputatlarni haqorat qilib, ularning shaʼni va qadr-qimmatini kamsitgan.
“Xalq deputatlari Bo‘ka tuman Kengashi raisi Abbosov betob bo‘lgani bois, biz Xalq deputatlari viloyat Kengashi raisi, viloyat rahbari Zoir Mirzayev qabuliga kelib, bizni ‘kalamush’, ‘xoin’, ‘hokim soldati’, deb atagan deputat ishini sud ko‘rib chiqqanini, Kengash va sud qarorini Xalq deputatlari viloyat Kengashi kotibiyati mudiri bekor qilmoqchiligini aytish uchun keldik. Obidovaning deputatligiga uch yarim yil bo‘lgan bo‘lsa, o‘tgan vaqt davomida deputatlar haqida tuhmat, ig‘vo tarqatib keldi. Deputat boshqa deputatlarni ‘kalamush’, ayol deputatlar xoin, ‘Abbosovning soldati’, ‘iymonsiz’ deputatlikka noloyiqlar deb atagan. Hatto u Xalq deputatlari tuman Kengashi kotibiyati mudirasini axloqsizlikda ayblagan. Shuning uchun u sudga berildi. Sud Obidovani aybdor deb topib, bazaviy hisoblash miqdorining 5 baravari miqdorida jarima qo‘lladi. Deputat bundan norozi bo‘lib, viloyat apellyatsiya sudiga berdi. Sud buni ko‘rib, Obidovaning daʼvosini rad qildi”, — deydi Xalq deputatlari Bo‘ka tuman Kengashi raisi o‘rinbosari Usmon Jo‘rayev.
Hokim qabulida bo‘lganlarning taʼkidlashicha, Xalq deputatlari tuman Kengashi deputati Xurshida Obidovaning bu harakatlaridan so‘ng uning deputatlik vakolatini muddatidan oldin to‘xtatish bo‘yicha qaror qabul qilgan. Shuningdek, tuman prokurori tomonidan deputat daxlsizligini bekor qilish bo‘yicha Kengashga taqdimnoma kiritilgan va qo‘llab-quvvatlangan.
“Mazkur holatlardan so‘ng Kengash Obidovaning deputatlik vakolatini muddatidan oldin to‘xtatib, uning daxlsizligini bekor qilish haqida qaror qabul qildi. Obidova esa bundan norozi bo‘lib, sudlarga murojaat qildi. Ammo daʼvosi rad etildi. Shunga qaramasdan Xalq deputatlari viloyat Kengashi kotibiyati mudiri uni qo‘llab-quvvatlab, bizning qarorimizni bekor qilishga urinmoqda”, — deydi deputat.
Buni eshitgan viloyat hokimi kotibiyat mudirini advokatlikda ayblab, Kengash qarorini bekor qilishga urinayotgan kotibiyat xato qilganini bildirdi.
“Daryo” internet nashri qabul davomida Xalq deputatlari tomonidan ayblangan sobiq deputat Xurshida Obidovani topolmadi. Topishga urinishlari ham zoye ketdi. Shu sabab tahririyat Obidovaning daʼvolarini ham tinglashga, unga minbar berishga tayyorligini bildiradi.
Izoh (0)