Samarqandda 13-may kuni dunyo tarixida ilk bor tashkil etilgan Osiyo xotin-qizlari forumi o‘z ishini boshladi. Unda Senat raisi, Xotin-qizlarning jamiyatdagi rolini oshirish, gender tenglik va oila masalalari bo‘yicha respublika komissiyasi raisi Tanzila Norboyeva so‘zga chiqib nutq so‘zladi.
Unda Osiyo mintaqasida ayollarning o‘zaro tajriba almashish bo‘yicha ijobiy amaliyotga egaligini, xususan, Markaziy Osiyo mamlakatlari yetakchi ayollari muloqoti bugungi kunda gender tenglikni taʼminlash, ayollar huquq va manfaatlarini himoya qilishga oid mintaqadagi dolzarb muammolarni hal qilishda samarali platforma sifatida xizmat qilayotganini, uning tajribasi asosida butun Osiyo ayollarini birlashtirish zarur ekanligini aytib o‘tdi.
Shuningdek, O‘zbekistonning ijtimoiy-siyosiy, iqtisodiy hamda ma’naviy hayotida, muhim qarorlar qabul qilinishida xotin-qizlarning ishtiroki sezilarli ravishda kengayib borayotganini qayd etdi.
Bunga misol qilib qisqa davr ichida sohaga doir xalqaro standartlarga mos milliy qonunchilik bazasi shakllantirilganini, so‘nggi 5 yilda 80 dan ortiq normativ-huquqiy hujjatlar qabul qilinganini keltirdi. “Xotin-qizlar va erkaklarga teng xuquq hamda imkoniyatlar kafolatlari to‘g‘risida” hamda “Xotin-qizlarni tazyiq va zo‘ravonlikdan himoya qilish to‘g‘risida”gi qonunlar qabul qilinganini bildirib o‘tdi.
“Islohotlarni samarali amalga oshirishda ayollarimizning ijtimoiy-siyosiy faolligi muhim ahamiyat kasb etadi. Shu ma’noda, ularning davlat va jamiyat boshqaruvidagi roli hamda ta’sirini keskin oshirishga alohida e’tibor qaratish zarur”, — dedi Tanzila Norboyeva.
Senat raisi O‘zbekiston parlamenti yuqori va quyi palatalarida, mahalliy Kengash deputatlari tarkibida, ijro organlarida ham ayollar o‘rni ortib borayotgani ta’kidlab, bugun ayol vazirlar, vazir o‘rinbosarlari, hokimlar va hokim o‘rinbosari, yirik nodavlat notijorat tashkiloti rahbari lavozimidagi xotin-qizlar sinfi paydo bo‘lgani hamda yil sayin ularning soni ortib borayotgani alohida qayd etdi.
Eslatib o‘tamiz, Shavkat Mirziyoyev BMT Bosh Assambleyasining 78-sessiyasidagi nutqida O‘zbekistonda xotin-qizlarning boy salohiyatidan foydalanish, jamiyat hayotining barcha jabhalarida ularning imkoniyatlarini ro‘yobga chiqarishda tajriba almashish bo‘yicha Osiyo xotin-qizlari forumini o‘tkazish taklifini bildirgan edi. Shunga asosan “Xotin-qizlarning iqtisodiy, ijtimoiy va siyosiy huquq hamda imkoniyatlarini kengaytirish masalalariga mintaqaviy yondashuv” mavzusidagi Osiyo xotin-qizlari forumi Samarqand shahrida o‘z ishini boshladi.
-kPCkhc2C.jpg)
Unda 30 dan ortiq xorijiy davlatlar va xalqaro tashkilotlardan nufuzli mehmonlar – Sharqiy Osiyo, Janubi-Sharqiy Osiyo, Janubiy Osiyo va Markaziy Osiyo mamlakatlari parlamentlarining ayol aʼzolari, hukumatlari rahbarlari, xorijiy davlatlarning mamlakatimizdagi vakolatxonalari hamda xorijiy tashkilotlarning 40 nafardan ortiq vakillari, shuningdek, mahalliy davlat organlari va fuqarolik jamiyati institutlari vakillari, ayol rahbarlar, ishbilarmon ayollar, siyosatshunoslar, ijtimoiy soha faollari, olimlar, iqtisodiyot tarmoqlari va turli sohalarning jami 400 ga yaqin vakillari hamda faol xotin-qizlar ishtirok etmoqda.
Izoh (0)