2025-yilda mamlakatda bir necha turdagi soliqlar miqdori oshirilishi taklif etilmoqda. Bu haqda Iqtisodiyot va moliya vazirligi eʼlon qilgan byudjetnomada keltirilgan.
Manbaga ko‘ra, 2025-yilda O‘zbekistonda quyidagi soliqlar stavkalari o‘zgarishsiz saqlab qolinmoqda:
- Foyda solig‘ining bazaviy stavkasi — 15 foiz;
- Jismoniy shaxslardan olinadigan daromad solig‘i — 12 foiz;
- Qo‘shilgan qiymat solig‘i — 12 foiz;
- Ijtimoiy soliq — 12 foiz (budjet tashkilotlari uchun 25 foiz);
- Aylanmadan olinadigan soliqning bazaviy stavkasi — 4 foiz;
- Yuridik shaxslar mol–mulk solig‘i — 1,5 foiz.
Shuningdek, chet davlatlar avtotransport vositalari O‘zbekistonga kirgani va mamlakat hududi orqali tranziti uchun yig‘im hamda alkogol mahsulotlarini realizatsiya qilish huquqiga doir yig‘imlar miqdori ham oshirilmaydi.
Qonun loyihasiga ko‘ra, 2025-yil 1-apreldan boshlab neft mahsulotlari uchun to‘lanadigan aksiz soliq stavkalarini 10 foizga oshirish rejalashtirilmoqda. Mazkur tarkibga benzin, aviakerosin, dizel va EKO dizel yonilg‘isi, dizel yoki karbyurator (injektor) dvigatellari uchun motor moyi hamda yakuniy isteʼmolchiga realizatsiya qilinadigan benzin, dizel yonilg‘isi, suyultirilgan va siqilgan gaz kiradi.
Vazirlikning qayd etishicha, ushbu soliq stavkalarining oshirilishi neft mahsulotlari chakana narxiga sezilarli darajada taʼsir ko‘rsatmaydi.
2025-yil 1-yanvardan suv resurslaridan foydalanganlik uchun soliq stavkalarida quyidagilar taklif etilmoqda:
- elektr stansiyalari, kommunal xizmat ko‘rsatish korxonalari, alkogolsiz ichimliklar hamda alkogol mahsulotlari (pivo va vinodan tashqari) ishlab chiqaruvchilar hamda sanoat korxonalari uchun foydalaniladigan suv hajmiga qo‘llanadigan soliq stavkalarini o‘rtacha 10 foizga indeksatsiya qilish;
- kon-kimyo xomashyosi hamda boshqa noruda qurilish materiallari uchun qazib olingan hajmga belgilangan qatʼiy miqdorlarni 10 foizga indeksatsiya qilish.
Kelasi yil 1-yanvardan yuridik va jismoniy shaxslarning turar hamda noturar ko‘chmas mulk obyektlariga solinadigan mol-mulk solig‘i stavkalarini 10 foizga oshirish rejalashtirilmoqda. Shu bilan birga, yuridik va jismoniy shaxslardan olinadigan yer solig‘ining bazaviy stavkalari o‘rtacha 10 foizga indeksatsiya qilinmoqda.
2025-yil 1-yanvardan yakka tartibdagi tadbirkorlarning qatʼiy belgilangan miqdorlardagi soliq stavkalarini inflyatsiya darajasidan kelib chiqib 10 foizga oshirilmoqda. Shu sanadan boshlab mol-mulkni ijaraga beruvchi jismoniy va yuridik shaxslar uchun soliq solish maqsadida qo‘llanadigan ijara to‘lovining eng kam stavkalari 10-12 foizga indeksatsiya qilish belgilanmoqda.
2025-yil 1-yanvardan mobil aloqa xizmatlari uchun aksiz solig‘i bekor qilinadi. Mazkur davrdan boshlab import qilingan tabiiy gazni isteʼmolchilarga realizatsiya qilishda aksiz solig‘i solinmasligi bo‘yicha tartibni bekor qilgan holda, aksiz solig‘i stavkasini 20 foizdan 12 foizgacha pasaytirish rejalashtirilmoqda.
2025-yil 1-apreldan shirinlashtiruvchi yoki xushbo‘ylashtiruvchi moddalari mavjud gazlangan ichimliklarning 1 litri uchun aksiz solig‘i amaldagi 500 so‘mdan 300 so‘mgacha pasaytiriladi. Gazlanmagan ichimliklarga ham shu miqdor joriy etiladi.
Izoh (0)