2025 йилда мамлакатда бир неча турдаги солиқлар миқдори оширилиши таклиф этилмоқда. Бу ҳақда Иқтисодиёт ва молия вазирлиги эълон қилган бюджетномада келтирилган.
Манбага кўра, 2025 йилда Ўзбекистонда қуйидаги солиқлар ставкалари ўзгаришсиз сақлаб қолинмоқда:
- Фойда солиғининг базавий ставкаси — 15 фоиз;
- Жисмоний шахслардан олинадиган даромад солиғи — 12 фоиз;
- Қўшилган қиймат солиғи — 12 фоиз;
- Ижтимоий солиқ — 12 фоиз (бюджет ташкилотлари учун 25 фоиз);
- Айланмадан олинадиган солиқнинг базавий ставкаси — 4 фоиз;
- Юридик шахслар мол–мулк солиғи — 1,5 фоиз.
Шунингдек, чет давлатлар автотранспорт воситалари Ўзбекистонга киргани ва мамлакат ҳудуди орқали транзити учун йиғим ҳамда алкоголь маҳсулотларини реализация қилиш ҳуқуқига доир йиғимлар миқдори ҳам оширилмайди.
Қонун лойиҳасига кўра, 2025 йил 1 апрелдан бошлаб нефть маҳсулотлари учун тўланадиган акциз солиқ ставкаларини 10 фоизга ошириш режалаштирилмоқда. Мазкур таркибга бензин, авиакеросин, дизель ва ЭКО дизель ёнилғиси, дизель ёки карбюратор (инжектор) двигателлари учун мотор мойи ҳамда якуний истеъмолчига реализация қилинадиган бензин, дизель ёнилғиси, суюлтирилган ва сиқилган газ киради.
Вазирликнинг қайд этишича, ушбу солиқ ставкаларининг оширилиши нефть маҳсулотлари чакана нархига сезиларли даражада таъсир кўрсатмайди.
2025 йил 1 январдан сув ресурсларидан фойдаланганлик учун солиқ ставкаларида қуйидагилар таклиф этилмоқда:
- электр станциялари, коммунал хизмат кўрсатиш корхоналари, алкоголсиз ичимликлар ҳамда алкоголь маҳсулотлари (пиво ва винодан ташқари) ишлаб чиқарувчилар ҳамда саноат корхоналари учун фойдаланиладиган сув ҳажмига қўлланадиган солиқ ставкаларини ўртача 10 фоизга индексация қилиш;
- кон-кимё хом ашёси ҳамда бошқа норуда қурилиш материаллари учун қазиб олинган ҳажмга белгиланган қатъий миқдорларни 10 фоизга индексация қилиш.
Келаси йил 1 январдан юридик ва жисмоний шахсларнинг турар ҳамда нотурар кўчмас мулк объектларига солинадиган мол-мулк солиғи ставкаларини 10 фоизга ошириш режалаштирилмоқда. Шу билан бирга, юридик ва жисмоний шахслардан олинадиган ер солиғининг базавий ставкалари ўртача 10 фоизга индексация қилинмоқда.
2025 йил 1 январдан якка тартибдаги тадбиркорларнинг қатъий белгиланган миқдорлардаги солиқ ставкаларини инфляция даражасидан келиб чиқиб 10 фоизга оширилмоқда. Шу санадан бошлаб мол-мулкни ижарага берувчи жисмоний ва юридик шахслар учун солиқ солиш мақсадида қўлланадиган ижара тўловининг энг кам ставкалари 10-12 фоизга индексация қилиш белгиланмоқда.
2025 йил 1 январдан мобил алоқа хизматлари учун акциз солиғи бекор қилинади. Мазкур даврдан бошлаб импорт қилинган табиий газни истеъмолчиларга реализация қилишда акциз солиғи солинмаслиги бўйича тартибни бекор қилган ҳолда, акциз солиғи ставкасини 20 фоиздан 12 фоизгача пасайтириш режалаштирилмоқда.
2025 йил 1 апрелдан ширинлаштирувчи ёки хушбўйлаштирувчи моддалари мавжуд газланган ичимликларнинг 1 литри учун акциз солиғи амалдаги 500 сўмдан 300 сўмгача пасайтирилади. Газланмаган ичимликларга ҳам шу миқдор жорий этилади.
Изоҳ (0)