Teledebatlar partiyalar o‘rtasidagi ochiq va erkin siyosiy raqobatni ko‘rsatib bermoqda

Kuni kecha saylovoldi tashviqotlari doirasida bo‘lib o‘tgan teledebatda siyosiy partiyalarning o‘zaro murosasiz munosabatlariga guvoh bo‘ldik. Partiya spikerlari o‘rtasidagi savol-javoblarda o‘zaro takliflarga qo‘shilmaslik va ularning tanqidli qabul qilinishi kuzatildi. Bir tomondan, partiyalar o‘z g‘oyalarini ilgari surgan bo‘lsa, boshqa tomondan ushbu takliflarni asoslantirib berishga majbur bo‘ldilar.

Ayniqsa, debatlarning uchinchi raundi jiddiy munozaralarga aylanib ketdi. Bu raundda korrupsiya, taʼlim, soliq siyosati kabi masalalar muhokama qilindi. “Adolat” sotsial-demokratik partiyasining korrupsiyaga qarshi kurashishga oid taklifi Ekologik partiyaning tanqidiga sabab bo‘ldi. Bunga javoban “Adolat” vakili korrupsiyaga qarshi kurashish partiyaning emas, barchaning vazifasi ekanligini taʼkidladi. Shuningdek, “Adolat” SDP Korrupsiyaga qarshi kurashish agentligi maqomi va vakolatlarini kuchaytirish, korrupsiyaviy holatlarga chek qo‘yish tarafdori ekanligi maʼlum qilindi.

Taʼlim mavzusidagi bahs-munozaralar ham qizg‘in tus oldi. Jumladan, “Milliy tiklanish” demokratik partiyasining 7-sinfdan boshlab maktab o‘quvchilarini qobiliyatiga qarab o‘qitish taklifi “Adolat” partiyasi vakillarini xavotirga soldi. “Milliy tiklanish” vakili esa amaldagi tizimda bolaning xohishlari va qiziqishlari eʼtiborga olinmasligi adolatsizlik ekanini qayd etdi.

Soliq masalasida ham qarashlarda o‘zaro ziddiyat kuzatildi. O‘zLiDeP vakili XDPning ortiqcha hashamat uchun adolatli soliq solish tizimini joriy etish taklifini tanqid qilib, bu taklif iqtisodiyotga aks taʼsir etishi, mulkdorlarning manfaatlarini cheklashi mumkinligini taʼkidladi. Bunga javoban XDP vakili partiya mulkdorlarga qarshi emasligini, aksincha, bu taklif orqali ijtimoiy tengsizlikning oldi olinib, ijtimoiy loyihalar amalga oshirilishini maʼlum qildi. Bu bahs soliq siyosati ham iqtisodiy, ham ijtimoiy ahamiyatga ega ekanligidan dalolat beradi.

Debatlarda guvoh bo‘lganimizdek, siyosiy partilar muhokama qilingan sohalardagi mavjud muammolarni chuqur anglash bilan bir qatorda, ularni hal qilish yuzasidan o‘ziga xos va aniq yondashuvlariga ega ekanliklarini namoyon etmoqdalar.