“O‘zbekiston Respublikasi Vazirlar Mahkamasi to‘g‘risida”gi konstitutsiyaviy qonun 25-oktyabr kuni qabul qilindi.
-9JaiAtXc.jpg)
Unga ko‘ra, Vazirlar Mahkamasi — ijro etuvchi hokimiyatning oliy organi bo‘lib, iqtisodiyotning, ijtimoiy va ma’naviy sohalarning samarali faoliyat ko‘rsatishiga rahbarlik qilishni, konstitutsiya va qonunlar, Oliy Majlis palatalari qarorlari, prezident farmonlari, qarorlari va farmoyishlari ijrosini ta’minlaydi.
Vazirlar Mahkamasi O‘zbekistonda ijro etuvchi hokimiyatning yagona tizimiga rahbarlik qiladigan kollegial organdir. Vazirlar Mahkamasi o‘z faoliyatida Oliy Majlis va prezident oldida javobgardir. Respublika ijro etuvchi hokimiyat organlarining yaxlit tizimiga vazirliklar, qo‘mitalar, agentliklar va inspeksiyalar kiradi.
Vazirlar Mahkamasi O‘zbekiston hukumatining a’zolari — bosh vazir, uning o‘rinbosarlari va vazirlardan iboratdir. Qoraqalpog‘iston Respublikasi hukumatining boshlig‘i Vazirlar Mahkamasi tarkibiga o‘z lavozimi bo‘yicha kiradi.
Yangi tahrirdagi qonunga ko‘ra, Vazirlar Mahkamasining vakolatlariga jumladan quyidagilar kiradi:
- samarali iqtisodiy, ijtimoiy, soliq va byudjet siyosati amalga oshirilishi, ilm-fan, madaniyat, ta’lim, sog‘liqni saqlashni hamda iqtisodiyotning va ijtimoiy sohaning boshqa tarmoqlarini rivojlantirishga doir dasturlarning ishlab chiqilishi hamda baharilishi uchun javobgar bo‘ladi;
- barqaror iqtisodiy o‘sishni, makroiqtisodiy barqarorlikni ta’minlash, kambag‘allikni qisqartirish, aholi uchun munosib turmush sharoitlarini yaratish, oziq-ovqat xavfsizligini ta’minlash, qulay investitsiyaviy muhitni yaratish, hududlarni kompleks va barqaror rivojlantirish bo‘yicha choralar ko‘radi;
- aholini, shu jumladan nogironligi bo‘lgan shaxslarni ijtimoiy himoya qilish tizimining samarali faoliyat ko‘rsatishini ta’minlaydi;
- atrof-muhitni muhofaza qilish, tabiiy boyliklarni va bilologik xilma-xillikni saqlash, iqlim o‘zgarishiga, epidemiyalarga, pandemiyalarga qarshi kurashish hamda ularning oqibatlarini yumshatish sohalarida yagona davlat siyosati amalaga oshirilishini ta’minlaydi.
Qonun rasmiy e’lon qilingan kundan e’tiboran kuchga kirdi.
2024-yilning fevralida ushbu qonun loyihasi dastlabki tarzda ko‘rib chiqilgandi. U 55 moddadan iboratligi, Yangi tahrirdagi Konstitutsiyadan kelib chiqib, hukumatning iqtisodiyot, byudjet, moliya, soliq, ekologiya va atrof-muhitni muhofaza qilish sohalaridagi vakolatlari qayta ko‘rib chiqilayotgani ma’lum qilingandi.
Senatning 15-avgust kuni bo‘lib o‘tgan yalpi majlisida “O‘zbekiston Respublikasi Vazirlar Mahkamasi to‘g‘risida”gi konstitutsiyaviy qonun ma’qullandi. Mazkur qonun hukumat faoliyatini yangi tahrirdagi Konstitutsiyaga muvofiqlashtirish va uning zamonaviy sharoitda samarali ishlashini taʼminlashga qaratilgan.
Izoh (0)