Jahon banki va ayrim iqtisodchilar O‘zbekistonda iqtisodiy tengsizlik kuchayib borayotganidan xavotir bildirgan. Iqtisodiy tadqiqotlar va islohotlar markazi direktori Obid Hakimov “Daryo” muxbiri savoliga javoban, bunday fikrlar asossizligini aytdi.
Toshkent shahrida 17–25-oktyabr kunlari “Xalqaro hamkorlik tashabbuslari haftaligi” o‘tkazilmoqda. Haftalik doirasida turli sohalarga oid muloqotlar tashkil etilyapti. 21-oktyabr kuni bo‘lib o‘tgan uchrashuv O‘zbekistonda kambag‘allikni qisqartirish masalasiga bag‘ishlandi.
Tadbirda Obid Hakimov chiqish qilib, mamlakatda kambag‘allik ulushi tobora kamayib borayotganini aytdi. Yakunda markaz rahbari jurnalistlar bilan suhbatlashdi. “Daryo” muxbirining respublikada moliyaviy tengsizlik keskin kuchaygani haqidagi savoliga javoban, mutaxassis bunday fikrlar asossizligini aytdi.
“O‘zbekistonda iqtisodiy tengsizlik keskin kuchaydi degan fikrlarga qo‘shilmayman. Mamlakatdagi va qo‘shni davlatlardagi tengsizlik darajalari o‘sishini qarasangiz bu fikringizdan qaytasiz. Ayrim qo‘shni davlatlarda tengsizlik keskin oshib bormoqda. O‘zbekistonda kuchli ijtimoiy himoya tizimi bo‘lgani uchun tengsizlik meʼyori ushlab turilibdi. Bu har yili o‘lchanadi. Uy xo‘jaliklari byudjeti so‘rovnomasi doirasida tengsizlikni eng ko‘p o‘lchaydigan Gini koeffitsiyenti bo‘yicha o‘lchovlarni amalga oshiramiz.
Viloyatlar, hududlar yoki bo‘lmasa, erkak va ayollar kesimida bu masala tahlil qilinadi. Iqtisodchi Saymon Kuznes nazariyasiga ko‘ra, iqtisodiy rivojlanishning o‘sish davrida tengsizlik kuchayadi. Maksimum nuqtaga yetgach, iqtisodning davomli rivojlanishi bu tengsizlikni pasaytiradi. Shuning uchun tengsizlik O‘zbekiston davlat siyosatining tahlilida har doim inobatga olingan. Tahlil natijalari soliq va boshqa siyosatlarda aks etadi. O‘zbekistonda tengsizlik keskin o‘smagan, normal holatda deb ayta olaman”, dedi markaz rahbari.
Obid Hakimov jurnalistlar bilan suhbat davomida O‘zbekistonda kambag‘allikka qarshi kurashish yangi bosqichga o‘tishini aytdi.
“Endi faqatgina monetar kambag‘allikka qarshi kurashish emas, ko‘p o‘lchovli kambag‘allikka qarshi kurashish bo‘yicha davlat dasturi eʼlon qilindi. Bu dastur asosida kambag‘al oilalarga 50 ming gektar yer tarqatiladi. Bunday oilalarni bilim darajasini oshirish, kasbga o‘qitish, sog‘liqni saqlash va uy sharoitlarini yaxshilash rejalashtirilgan. 2025-yildan boshlab ko‘p o‘lchovli kambag‘allikka qarshi kurashish dasturiga o‘tamiz”, deya maʼlum qildi mutaxassis.
Tadbirdagi nutqida Obid Hakimov O‘zbekistonda kambag‘allik darajasi yiliga 3 foiz kamayayotganini aytib o‘tdi. Tahlilchining ta’kidlashicha, 2020-yilda 23 foiz aholining daromadlari kambag‘allik chegarasiga yetmagan. Bu ko‘rsatkich 2022-yilda 17 foiz, 2024-yilga kelib 11 foizga qisqargan.
Izoh (0)