Otabek Tursunov 17-oktyabr kuni Toshkent viloyati hokimining birinchi o‘rinbosari etib tayinlandi. Bu haqda viloyat hokimligi matbuot xizmati xabar berdi.
U hokimning moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — viloyat iqtisodiyot va moliya bosh boshqarmasi boshlig‘i bo‘ldi.
Otabek Tursunov 1984-yilda Andijon shahrida tug‘ilgan. 2007-yilda Andijon muhandislik-iqtisodiyot institutini tamomlagan. Ilk mehnat faoliyatini Andijon shahar “Sanoat qurilish temp” MCHJ taʼminotchisi vazifasidan boshlagan. Faoliyati davomida Iqtisodiy taraqqiyot va kambag‘allikni qisqartirish vazirligida masʼuliyatli lavozimlarda ishlagan.
Tayinlovga qadar, Vazirlar Mahkamasi Iqtisodiyot, sanoat, moliya-bank, soliq, davlat aktivlari, tadbirkorlikni qo‘llab-quvvatlash va kambag‘allikni qisqartirish masalalari kotibiyati mudirining o‘rinbosari lavozimida faoliyat yuritayotgan edi.
Viloyat hokimining avvalgi birinchi o‘rinbosari Erkin Muxitdinov faoliyatidagi kamchiliklar va sohadagi ishlar qoniqarsiz olib borilayotgani uchun 15-oktyabr kuni prezident raisligida o‘tkazigan yig‘ilishda lavozimidan ozod etilgandi. Ushbu lavozimga 2024-yilning 20-mayida tayinlangandi.
Izoh (0)