Oliy Majlis Senatining 59-yalpi majlisida kun tartibidagi “O‘zbekiston Respublikasi Oliy Majlisining inson huquqlari bo‘yicha vakili (ombudsman) to‘g‘risida”gi qonun ko‘rib chiqib ma’qullandi.
Majlisda Tanzila Norboyeva qonun haqida fikr bildirar ekan, ombudsmanga bajarilishi lozim bo‘lgan vazifalarni ta’kidlab o‘tdi.
“Hozir qonun bilan ombudsmanning ma’ruza yoki axborot taqdim etish vakolatlari qat’iy belgilab qo‘yilyapti. Oliy Majlis palatalariga faoliyati to‘g‘risida va qiynoq holatlarining oldini olish bo‘yicha ma’ruza berishingiz kerak, undan tashqari, tizimli ravishda prezidentga ma’ruza va axborotlaringizni kiritib turishingiz kerak.
Oliy Majlis palatalariga, Vazirlar Mahkamasiga joylarda inson huquqlariga oid qonunchilik normalarining bajarilishi bo‘yicha axborot hamda ma’ruza kiritishingiz lozim.
Hozir siz kirityapmiz, deyapsiz, lekin siz kiritgan taqdimnoma deymizmi, axborot deymizmi, qay darajada e’tiborga olinyapti hamda bajarilyapti — buning ustidan qat’iy monitoring qilishingiz va bajarmayotgan ijro organi yoki tashkilot to‘g‘risida, ularni mas’uliyatga chaqirish to‘g‘risida Oliy Majlis palatasiga hali biror marta axborot kiritganingiz yo‘q. Shuning uchun qonunda hozir belgilanyaptiki, bundan keyin inson huquqlariga oid normalar bajarilmayotgan bo‘lsa, demak, o‘z vakolatlaringizdan to‘liq foydalanishga asos bo‘lyapti”, dedi senat raisi.
Senat raisining ta’kidlashicha, mintaqaviy vakillar faqatgina majlislarda qatnashishi yoki tinglashi emas, balki o‘z hududida inson huquqlariga oid qonunchilik normalarining bajarilishini qat’iy monitoring qilishi kerak.
“Ular xalq deputatlari mahalliy kengashlariga xuddi siz palatalarga axborot berganingiz kabi axborot berishlari, bajarilishini ta’minlashi kerak. Bizda hozir bu narsa yo‘q. Faqatgina bir yilda bir marta, ikki marta kelib, palatalarga axborot berasiz, mintaqaviy vakillaringiz ishtirok qiladi, shu bilan ketaveradi”, deydi Tanzila Norboyeva.
Avvalroq Senat o‘tgan besh yilda qancha qonunni rad etgani ma’lum qilingan edi.
Izoh (0)