Oliy Majlis Qonunchilik palatasining Korrupsiyaga qarshi kurashish va sud-huquq masalalari qo‘mitasining yig‘ilishida bir guruh deputatlar tomonidan ishlab chiqilgan “O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun loyihasi dastlabki tarzda ko‘rib chiqildi. Bu haqda parlament quyi palatasi matbuot xizmati xabar berdi.
Qayd etilishicha, mazkur qonun loyihasi bilan 13 ta qonun, 1 ta kodeksga tegishli o‘zgartirish va qo‘shimchalar kiritish nazarda tutilmoqda.
Jumladan, 100 ming nafardan kam bo‘lmagan fuqarolar, Senat, Ombudsman va Markaziy saylov komissiyasi qonunchilik takliflarini Qonunchilik palatasiga kiritishga haqli ekanligi mustahkamlanmoqda. Ushbu qoidaning kiritilishi davlat ishlarini boshqarishda fuqarolarning ishtirokini kengaytiradi.
Shuningdek, Qonunchilik palatasidagi fraksiya rahbarining vakolatlari alohida moddada aniq belgilanmoqda. Parlament tekshiruvini Qonunchilik palatasi deputatlari va Senat aʼzolari orasidan tenglik asosida tuziladigan birgalikdagi maxsus komissiyasi tomonidan o‘tkazilishi ko‘zda tutilmoqda.
Bundan tashqari, Qonunchilik palatasi qo‘mitalariga hukumat aʼzolarining hisobotlari va davlat organlari rahbarlarining axborotini eshitish tashabbusi bilan chiqish huquqi berilmoqda.
Yig‘ilish yakunida qo‘mita aʼzolari qonun loyihasi jamoatchilik muhokamasi yakunlari hamda xalqaro huquqning umum eʼtirof etilgan prinsiplari va normalari hisobga olingan holda maromiga yetkazilishi haqida qaror qabul qilgan. Qonun loyihasini konseptual jihatdan parlament majlisida ko‘rib chiqish uchun Kengashga taklif qilish masalasi hal qilingan.
Avvalroq Oliy Majlis Qonunchilik palatasining majlisida Jinoyat, Jinoyat-protsessual kodekslariga hamda Ma‘muriy javobgarlik to‘g‘risidagi kodeksiga o‘zgartirish va qo‘shimchalar kiritish haqidagi qonun loyihasi ko‘rib chiqilgani to‘g‘risida xabar berilgandi.
Izoh (0)