Bir guruh deputatlar tomonidan ishlab chiqilgan “O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun loyihasining takomillashtirilgan matni Oliy Majlis Qonunchilik palatasining navbatdagi yalpi majlisida ko‘rib chiqiladi. Bu haqda Oliy Majlis Qonunchilik palatasi Parlament axborot markazi “Daryo”ga maʼlum qildi.
Axborotda aytilishicha, yangi tahrirdagi Konstitutsiyamizda ilgaridan farqli ravishda O‘zbekiston Respublikasining Konstitutsiyaviy sudi, Oliy sudi va bosh prokurori faqatgina o‘z vakolatlari jumlasiga kiritilgan masalalar bo‘yicha qonunchilik tashabbusi huquqiga ega ekanligi belgilandi.
“Biroq ushbu talab bajarilmaganda qonun loyihasining taqdiri ochiq qolgan edi. Shundan kelib chiqib, masʼul qo‘mita ayrim subyektlar tomonidan vakolati jumlasiga kiritilmagan masalalar bo‘yicha qonun loyihasi kiritilganda ularni tashabbuskor subyektga qaytarishni taklif etmoqda.
Bundan tashqari, qonun loyihasida Qonunchilik palatasiga kiritiladigan qonunchilik takliflarini ko‘rib chiqishning muhim tartibi belgilanyapti. Maʼlumki, 100 ming nafardan kam bo‘lmagan fuqarolar, Senat, Ombudsman va Markaziy saylov komissiyasi qonunchilik takliflarini Qonunchilik palatasiga kiritishga haqli”, — deyiladi quyi palata maʼlumotida.
Qo‘shimcha qilinishicha, taklif etilayotgan qonun loyihasi bilan ushbu qonunchilik taklifini, unga ilova qilinadigan hujjatlar ro‘yxati, eng asosiysi, bunday taklifni Qonunchilik palatasida ko‘rib chiqish mexanizmi ochib berilmoqda.
Izoh (0)