Fan va innovatsion rivojlanish masalalarini tartibga soluvchi qonunchilik bo‘yicha tajriba almashishni yo‘lga qo‘yishda Parlamentlararo ittifoq muvofiqlashtiruvchi vazifasini bajarishi kerak. Bu haqda senat raisi Tanzila Norboyeva Jeneva shahrida bo‘lib o‘tgan Parlamentlararo ittifoqning 149-assambleyasida aytib o‘tgan.
Senat raisi boshchiligidagi O‘zbekiston delegatsiyasi Parlamentlararo ittifoqning 149-assambleyasi doirasida tashkil etilgan “Tinch va barqaror kelajak uchun fan, texnologiya va innovatsiyalardan foydalanish” mavzusidagi debatda ishtirok etgan.
Senat raisining ta’kidlashicha, parlamentlarning sa’y-harakatlarini birlashtirishda uning imkoniyatlari va nufuzidan unumli foydalanish maqsadga muvofiq.
Xususan, ta’lim, fan va innovatsion rivojlanish masalalarini tartibga soluvchi qonunchilik bo‘yicha tajriba almashishni yo‘lga qo‘yishda Parlamentlararo ittifoq muvofiqlashtiruvchi vazifasini bajarishi kerak.
Ayniqsa, byudjetni shakllantirish jarayonida fan va innovatsion rivojlanishga jalb etiladigan sarmoyani ko‘paytirishga alohida e’tibor qaratish lozim. Parlamentlar ushbu yo‘nalishda byudjet xarajatlarini ko‘paytirishga ko‘maklashishlari zarur, dedi Norboyeva xonim.
Uning alohida ta’kidlashicha, parlamentlararo ittifoq doirasida parlamentlarning kadrlar salohiyatini oshirish va rivojlantirish bo‘yicha tajriba almashishni yo‘lga qo‘yish lozim.
Assambleya ishi doirasida Tanzila Norboyeva Parlamentlararo ittifoq raisi Tuliya Ekson hamda ittifoq bosh kotibi Martin Chungong bilan uchrashgan.
Izoh (0)