26-aprel kuni Oliy Majlis Senati raisi Tanzila Norboyeva boshchiligida xotin-qizlar va bolalar huquqlarini himoya qilish, shuningdek, voyaga yetmaganlarga nisbatan nojo‘ya harakatlarni sodir etganlik uchun javobgarlikni yanada kuchaytirish masalalariga bag‘ishlangan majlis bo‘lib o‘tdi. Bu haqda parlament yuqori palatasi matbuot xizmati “Daryo”ga ma’lum qildi.
Yig‘ilishda Oliy Majlis Senati a’zolari, Oliy Majlisning Inson huquqlari bo‘yicha vakili (ombudsman) o‘rinbosari, shuningdek, vazirlik va idoralar, nodavlat notijorat tashkilotlari, ommaviy axborot vositalari vakillari ishtirok etgan.
Qayd etilishicha, avvallari ushbu toifadagi insonlarga tazyiq va zo‘ravonlik yopiq mavzu bo‘lib, u ochiq-oshkora muhokama qilinmagan.
“Afsuski, sohada amalga oshirilayotgan ishlarga qaramasdan, salbiy holatlar hanuzgacha sodir etilmoqda. Xotin-qizlar va voyaga etmaganlarga nisbatan zo‘ravonlik va shilqimlik holatlari hali ham uchrab turibdi. Bu amaldagi qonunchilik va huquqni qo‘llash normalarini puxta ko‘rib chiqishni, ularni mavjud voqelikka moslashtirishni talab qiladi”, — deyiladi xabarda.
Shu munosabat bilan Oliy Majlis Senatida Xotin-qizlar va bolalar huquqlarini himoya qilish, shuningdek, voyaga yetmaganlarga nisbatan nomaqbul harakatlarni sodir etganlik uchun javobgarlikni yanada kuchaytirish masalalarini o‘rganish bo‘yicha Ishchi guruh tuzilgan. Unga huquqni qo‘llash amaliyotini tahlil qilish va amaldagi normativ-huquqiy hujjatlarni xatlovdan o‘tkazish, xalqaro tajribani chuqur o‘rganish hamda xotin-qizlar va bolalar huquqlarini himoya qilish sohasidagi qonunchilik bazasini takomillashtirish bo‘yicha takliflar ishlab chiqish vazifalari yuklatilgan, ular keyinchalik mamlakat parlamenti tomonidan ko‘rib chiqiladi.
Bundan tashqari, amalga oshirilishi lozim bo‘lgan ishlarni o‘z ichiga olgan Chora-tadbirlar rejasi tasdiqlangan. E’tiborli jihati, uni amalga oshirishga ixtisoslashgan faoliyat bilan shug‘ullanayotgan nodavlat notijorat tashkilotlari va mustaqil ekspertlar jalb etiladi.
Shu munosabat bilan NNT, fuqarolik jamiyati institutlari vakillari, olimlar va mutaxassislar Oliy Majlis Senatida tashkil etilgan Ishchi guruh faoliyatida faol ishtirok etishga chaqiriladi. U bilan “Senat14@exat.uz”, “Qonunchilik@senat.go.uz” elektron manzillari orqali bog‘lanish mumkin.
Mavzuga doir:
- Toshkent metropolitenida 13 yoshli qizga behayo harakatlar qilgan shaxsga jinoyat ishi qo‘zg‘atildi. U bir yilgacha ozodlikdan mahrum qilinishi mumkin.
- Buxoroda 14 yoshli qizni zo‘rlab kelgan cho‘pon 3 yilga ozodlikdan mahrum qilindi
- Sirdaryodagi maktab hojatxonasida 8 yoshli qizga nisbatan axloqsiz harakatlarni amalga oshirgan erkak 10 yilga qamaldi
Izoh (0)