Senatning 24-yalpi majlisi 17-mart kuni bo‘lib o‘tadi

Toshkent shahrida 17-mart kuni Oliy Majlis Senatining 24-yalpi majlisi bo‘lib o‘tadi. Bu haqda Senat axborot xizmati xabar qildi.

Qayd etilishicha, 10-mart kuni Senati Kengashining majlisi bo‘lib o‘tgan. Unda Senatning 24-yalpi majlisini 17-mart kuni chaqirish to‘g‘risida qaror qabul qilingan. Videokonferensaloqa shaklida ikki kun davomida bo‘lib o‘tadigan yalpi majlis doirasida bir qator masalalar ko‘rib chiqilishi nazarda tutilgan. Jumladan:

• “O‘zbekiston Respublikasining Mehnat kodeksini tasdiqlash to‘g‘risida”gi;“Nobank kredit tashkilotlari va mikromoliyalashtirish faoliyati to‘g‘risida”gi;“Kiberxavfsizlik to‘g‘risida”gi;“Organik mahsulotlar to‘g‘risida”gi;“Reklama to‘g‘risida”gi qonunlar muhokama qilinadi.

Bundan tashqari, “O‘zbekiston Respublikasining Fuqarolik kodeksiga qiynoqqa solishdan jabrlanganlarga yetkazilgan zararni qoplash tartibini takomillashtirishga qaratilgan qo‘shimchalar kiritish to‘g‘risida”gi, “Inson a’zolari va to‘qimalarining transplantatsiyasi to‘g‘risida”gi qonunlar qabul qilingani munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish haqida”gi, “Korporativ boshqaruv tizimi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonunlar muhokama etilishi rejalashtirilgan.

Shuningdek, senatorlar Inson huquqlari bo‘yicha vakil (ombudsman)ning 2021-yildagi faoliyati to‘g‘risidagi hisobotini eshitadi. Yalpi majlisda Qashqadaryo viloyati Chiroqchi tumanining chegaralarini o‘zgartirish va Ko‘kdala tumanini tashkil etish masalasi ko‘rib chiqiladi.

Shu bilan birga, Tashqi ishlar vazirligining 2021-yildagi faoliyati to‘g‘risidagi, ichki ishlar vazirining huquqbuzarliklarning oldini olish va ularning profilaktikasi holati to‘g‘risidagi 2021-yil yakuni bo‘yicha, Korrupsiyaga qarshi kurashish agentligi direktorining davlat organlari va tashkilotlari faoliyati ochiqligini ta’minlash borasida amalga oshirilgan ishlar to‘g‘risidagi axborotlari eshitilishi ham rejalashtirilgan.

Senatorlar tomonidan qon va uning tarkibiy qismlari donorligi sohasini rivojlantirish uchun ko‘rilayotgan choralar to‘g‘risida Vazirlar Mahkamasiga yuborilgan parlament so‘rovi natijalarini ko‘rib chiqish nazarda tutilgan.

Yalpi majlisda Agrar va suv xo‘jaligi masalalari qo‘mitasining 2020—2021-yillardagi faoliyati to‘g‘risidagi hisoboti ham eshitiladi. Senatorlar prezidentning ayrim farmonlarini hamda Kengashning qarorlarini tasdiqlash masalalarini ko‘rib chiqadi.

Senat Kengashining majlisida prezidentining farmonlariga asosan tayinlangan hamda Markaziy saylov komissiyasining qarorlariga muvofiq ro‘yxatga olingan senatorlar — Zulayho Mahkamova va Gulnora Marufova Senatning tegishli qo‘mitalari a’zolari etib saylangan.

Majlis 17-mart kuni soat 10:00 da Oliy Majlis Senatining majlislar zalida o‘z ishini boshlaydi. Yalpi majlis 17—18-mart kunlari videokonferensaloqa shaklida o‘tkazilishi rejalashtirilgan. Majlis “O‘zbekiston” va “Uzreport” telekanallari, shuningdek, Senatning rasmiy veb-sayti va ijtimoiy tarmoqlardagi sahifalari orqali to‘g‘ridan-to‘g‘ri yoritib boriladi.