Ombudsman faoliyati natijadorligi 2021-yilga nisbatan 2,5 barobarga oshdi

Senat yalpi majlisida Oliy Majlisning Inson huquqlari bo‘yicha vakili Feruza Eshmatovaning hisoboti muhokama qilindi.

Ta’kidlanishicha, 2022-yilda ombudsman nomiga O‘zbekiston fuqarolari va fuqaroligi bo‘lmagan shaxslardan, chet el fuqarolaridan va xorijiy davlatlar ombudsmanlaridan, shuningdek, harakatlanish erkinligi cheklangan shaxslar saqlanadigan joylarda saqlanayotgan shaxslardan, ularning yaqin qarindoshlari va himoyachilaridan (advokatlardan) jami 17761 ta murojaat kelib tushib, 2021-yilga nisbatan 977 taga yoki 5,2 foizga kamaygan.

Ombudsmanga yuborilgan takroriy murojaatlar sonini keskin kamaytirish bo‘yicha ko‘rilgan choralar natijasida takroriy murojaatlarning soni 2022-yilda 2021-yilga nisbatan 734 taga yoki 15,8 foizga kamaydi. Fuqarolardan kelib tushgan murojaatlar viloyatlar kesimida tahlil qilinganda, eng ko‘p murojaatlar Qashqadaryo, Toshkent shahri, Surxondaryo  va Toshkent viloyatidan, eng kam murojaatlar esa Sirdaryo, Qoraqalpog‘iston Respublikasi va Andijon viloyatidan  kelib tushgan.

Ombudsman so‘roviga asosan vakolatli davlat organlari mas’ul xodimlari harakatlarida qonun buzilishi holatlari aniqlanib, 3 nafar mas’ul xodim egallab turgan lavozimidan ozod etilgan, 22 nafar mas’ulga hayfsan intizomiy jazo chorasi qo‘llanilgan, 6 nafar mas’ulga o‘rtacha oylik ish haqining 30,0 foizi miqdorida jarima intizomiy jazosi qo‘llanilgan, 3 nafar mas’ul xodim o‘z ishiga sovuqqonlik bilan yondashganligi uchun ma’muriy javobgarlikka tortilgan.

2022-yilda fuqarolarning murojaatlari asosida undirilgan hamda undirishi belgilangan mablag‘lar 2 milliard 372 million so‘mni tashkil etdi. Shundan 45,4 million so‘mdan ortiq aliment to‘lovlari, 505,9 million so‘mi fuqarolarning ish haqi va mehnat munosabatlari bilan bog‘liq to‘lovlar hisoblanadi.