Олий Мажлис Сенатининг 59-ялпи мажлисида кун тартибидаги “Ўзбекистон Республикаси Олий Мажлисининг инсон ҳуқуқлари бўйича вакили (омбудсман) тўғрисида”ги қонун кўриб чиқиб маъқулланди.
Мажлисда Танзила Норбоева қонун ҳақида фикр билдирар экан, омбудсманга бажарилиши лозим бўлган вазифаларни таъкидлаб ўтди.
“Ҳозир қонун билан омбудсманнинг маъруза ёки ахборот тақдим этиш ваколатлари қатъий белгилаб қўйиляпти. Олий Мажлис палаталарига фаолияти тўғрисида ва қийноқ ҳолатларининг олдини олиш бўйича маъруза беришингиз керак, ундан ташқари, тизимли равишда президентга маъруза ва ахборотларингизни киритиб туришингиз керак.
Олий Мажлис палаталарига, Вазирлар Маҳкамасига жойларда инсон ҳуқуқларига оид қонунчилик нормаларининг бажарилиши бўйича ахборот ҳамда маъруза киритишингиз лозим.
Ҳозир сиз киритяпмиз, деяпсиз, лекин сиз киритган тақдимнома деймизми, ахборот деймизми, қай даражада эътиборга олиняпти ҳамда бажариляпти — бунинг устидан қатъий мониторинг қилишингиз ва бажармаётган ижро органи ёки ташкилот тўғрисида, уларни масъулиятга чақириш тўғрисида Олий Мажлис палатасига ҳали бирор марта ахборот киритганингиз йўқ. Шунинг учун қонунда ҳозир белгиланяптики, бундан кейин инсон ҳуқуқларига оид нормалар бажарилмаётган бўлса, демак, ўз ваколатларингиздан тўлиқ фойдаланишга асос бўляпти”, деди сенат раиси.
Сенат раисининг таъкидлашича, минтақавий вакиллар фақатгина мажлисларда қатнашиши ёки тинглаши эмас, балки ўз ҳудудида инсон ҳуқуқларига оид қонунчилик нормаларининг бажарилишини қатъий мониторинг қилиши керак.
“Улар халқ депутатлари маҳаллий кенгашларига худди сиз палаталарга ахборот берганингиз каби ахборот беришлари, бажарилишини таъминлаши керак. Бизда ҳозир бу нарса йўқ. Фақатгина бир йилда бир марта, икки марта келиб, палаталарга ахборот берасиз, минтақавий вакилларингиз иштирок қилади, шу билан кетаверади”, дейди Танзила Норбоева.
Аввалроқ Сенат ўтган беш йилда қанча қонунни рад этгани маълум қилинган эди.
Изоҳ (0)