Isroil tashqi ishlar vaziri Israel Kats BMT bosh kotibi Antoniu Guterrishni persona non grata deb e’lon qildi. Bunga Guterrish Eronning Isroilga uyushtirgan raketa hujumini so‘zsiz qoralamaganini sabab qilib keltirdi.
"BMT bosh kotibi Antoniu Guterrishga mamlakatga kirish taqiqlandi", deb yozdi Kats X ijtimoiy tarmog'ida.
“Eronning Isroilga qarshi jirkanch hujumini so‘zsiz qoralay olmasa, dunyoning deyarli barcha davlatlaridan farqli o‘laroq, Isroil tuprog‘iga qadam qo‘yishga loyiq emas”, deb davom etdi u.
Kats, shuningdek, Guterrishni 2023-yil 7-oktyabrda Isroilga qilingan HAMAS hujumini haligacha qoralamaganlikda va HAMASni terrorchi tashkilot deb eʼlon qilishga urinmaganlikda aybladi.
Kecha 1-oktyabr kuni Eron Isroilga ko‘p miqdordagi ballistik raketalar bilan hujum qildi. Isroil mazkur hujumga vaqti kelganda javob berishini ma’lum qildi.
Izoh (0)