Pokiston tashqi ishlar vaziri 11-iyun kuni o‘z hukumati va jahon hamjamiyatini Isroilga nisbatan qurol-yarog‘ embargosi joriy etishga chaqirgan. Bu haqda Arab News nashri xabar berdi.
Is’hoq Dar Isroilni qurol-yarog‘ oqimidan uzib qo‘yishga chaqirgan. Bu yo‘l bilan Tel-Avivni harbiy kampaniyani davom ettirishdan to‘xtatish mumkinligini maʼlum qilgan.
Pokiston rasmiysi yahudiy davlatini 2023-yil oktyabridan beri 37 mingdan ortiq falastinlikni o‘ldirgani uchun tanqid qilgan. Isroil mojarosini bir necha davlatlar emas, balki xalqaro miqyosda hal qilishga chaqirgan.
Manbada aytilishicha, Is’hoq Dar 11-iyun kuni Iordaniya qiroli Abdulloh II, Misr prezidenti Abdulfattoh al Sisi va BMT Bosh kotibi Antonio Guterrish tomonidan birgalikda tashkil etilgan “Harakatga chaqiruv: G‘azo uchun shoshilinch gumanitar javob” konferensiyasida ishtirok etish uchun Iordaniyaga borgan. Aynan shu uchrashuv doirasida qurol-yarog‘ embargosi masalasini ko‘targan.
“Bosh vazir o‘rinbosari va tashqi ishlar vaziri Muhammad Is’hoq Dar seshanba kuni Isroilga barcha harbiy taʼminot uchun embargo qo‘yish va qurol savdosini taqiqlashga chaqirdi, shuningdek, G‘azo va G‘arbiy Sohilda falastinlik tinch aholini himoya qilish uchun xolis xalqaro kuchlarni joylashtirish masalasini ko‘rib chiqishni taklif qildi”, — deya xabar bergan hodisa haqida Associated Press of Pakistan.
Dar konferensiyada, shuningdek, Falastinda zudlik bilan o‘t ochishni to‘xtatishga erishish va Isroil askarlarini Falastin hududlaridan olib chiqib ketishga chaqirgan. U jahon “qudratlari”ni o‘z rolini o‘ynashga, G‘arbiy Sohildagi zo‘ravonliklarni to‘xtatishga va G‘azodagi falastinliklarga gumanitar yordam ko‘rsatishni kuchaytirishga chaqirdi.
“Biz G‘azodagi har qanday demografik yoki hududiy o‘zgarishlarga qatʼiyan qarshimiz. Falastin davlatini Birlashgan Millatlar Tashkilotining to‘liq aʼzosi sifatida zudlik bilan qabul qilinish vaqti keldi”, — degan Is’hoq Dar.
Izoh (0)