Eron oliy rahnamosi Oyatulloh Ali Xomanaiyning aytishicha, Livanning “Hizbulloh” harakati qo‘mondonligi a’zolarining Isroilning so‘nggi zarbalari oqibatida halok bo‘lishi guruhni sezilarli darajada zaiflashtirmaydi. Bu haqida Yaqin Sharq OAVga tayanib, “Interfaks” xabar bermoqda.
Shubhasiz, “Hizbulloh” harakatining oliy qo‘mondonlarining o‘limi guruhga zarar yetkazdi, ammo bu zarar “Hizbulloh”ni tiz cho‘ktirishga qodir emas, dedi Oyatulloh Xomanaiy.
23-sentyabr kuni Isroil mudofaa vaziri Yoav Galant Livanda “Shimol o‘qlari” deb nomlangan hujum operatsiyasini e’lon qilgan edi. Isroil bosh vaziri Binyamin Netanyaxu mahalliy aholini “Hizbulloh” muassasalari yaqinidagi hududlarni tark etishga chaqirgan.
Hujumlarning birinchi kunida, Livan Sog‘liqni saqlash vazirligi ma’lumotlariga ko‘ra, 558 kishi, shu jumladan, 50 nafar bola va 94 nafar ayol halok bo‘lgan, yana 1835 kishi jarohat olgan. Mamlakat janubidagi minglab aholi uylarini tark etishga majbur bo‘lgan.
BMT bosh kotibi Antoniu Guterrish mazkur voqaealar tufayli Livan "ikkinchi G‘azo"ga aylanishi mumkinligidan xavotir bildirdi.
“Men Livanning yangi G‘azoga aylanishi ehtimolidan xavotirdaman. Menimcha, bu butun dunyo uchun dahshatli fojia bo‘ladi”, dedi u.
Izoh (0)